2018 йилги Осиё чемпионлари: "Ортда қолган ўйинлар давомида уларнинг мухлисига айландик"

"Самурайлар" ютиб бўлмайдиган жамоа эмас. Бу ишни 2018 йил олимпия терма жамоамиз уддасидан чиқа олганди. Хўш, бугунги учрашув олдидан улар қандай фикрда?

Жавоҳир Сидиқов - Японияга қарши ўйин футболчиларимизнинг кейинги фаолиятига таъсир қилади. Бугун шундай кун. Ҳамма босимни ташқарида қолдириш керак. Яқинлари, ота-она, дўстлари фахрланишлигини ҳис қилишсин. Майдонга эса масъулият билан тушишнинг ўзи ғалабани таъминлайди. Худодан дуо қилиб ғалаба ёр бўлишини сўраб қоламиз. Ортда қолган ўйинларда биз ҳам сизларнинг мухлисингизга айландик.  2018 йилги учрашувга келсак, ўшанда ички муҳитимиз ажойиб, жамоа аҳил бўлган. Ҳозирги терма жамоамизни ҳам ташқаридан кузата туриб бу борада муаммо йўқлигини сезяпман. 

Ботирали Эргашев - Нима бўлганда ҳам омад тилаймиз. Укаларимизга ишонамиз. Улар бунинг уддасидан чиқишади. Мусобақа якунида чемпионлик кубогини бош узра баланд кўтариш насиб қилсин. Ҳиссиётларга бой ўтган 2018 йилги Осиё кубогида Японияни кучли характер ва ирода эвазига ютган эдик. Бугун ҳам шундай бўлишини  истаймиз. 

Бобир Абдихолиқов - Япониянинг бу мусобақадаги ўйинларини кўрмадим. Шу боис бирор нарса дейишим қийин. Терма жамоамизга эса омад тилайман. Футболчиларимизга ишонамиз. Улар кутилган натижани қўлга киритишади.