1982 йилдан буён Жаҳон чемпионатларининг ҳар бир финалида "Интер" футболчиси ўйнаган + ФОТО

Айни пайтда Ўзбекистон миллий терма жамоаси ҳам ана шу мундиалга йўл олиш учун курашмоқда. Ҳозир эса тўрт йилликнинг энг нуфузли мусобақаси финалларига оид битта қизиқарли фактни суратлар ёрдамида эътиборингизга ҳавола этамиз.

Демак, 1982 йилги Жаҳон чемпионатидан буён ҳар бир финал ўйинида албатта "Интер" ўйинчиси тўп тепиб келмоқда. Булар:

1982 - Жузеппе Бергоми (Италия)
1986 - Карл-Хайнц Румменигге (Германия Федератив Республикаси)
1990 - Юрген Клинсман (Германия Федератив Республикаси)
1994 - Никола Берти (Италия)
1998 - Роналдо (Бразилия)
2002 - Роналдо (Бразилия)
2006 - Марко Матерацци (Италия)
2010 - Уэсли Снейдер (Голландия)
2014 - Родриго Паласио (Аргентина)

ЖЧ-1982. Финал. Италия - Германия ФР 3:1. Жузеппе Бергоми 3-рақамда.

ЖЧ-1986. Финал. Аргентина - Германия ФР 3:2. Карл-Хайнц Румменигге аргентиналиклар сардори Диего Армандо Марадона билан, ўша финалда Румменигге гол ҳам урган.

ЖЧ-1990. Финал. Германия ФР - Аргентина 1:0. Ўша пайтда "Интер" футболчиси ҳисобланган Юрген Клинсман мундиалда 3та гол уриш билан бирга рамзий терма жамоадан ҳам ўрин олган.

ЖЧ-1994. Финал. Бразилия - Италия 0:0 (пенальтилар серияси - 3:2). Никола Берти Бразилиянинг ўнг қанот ҳимоячиси Кафуга қарши.

ЖЧ-1998. Финал. Бразилия - Франция 0:3. Роналдо ўша финалда мағлуб бўлган, лекин мундиалда 4та гол уришга муваффақ бўлган ва энг яхши ўйинчи деб тан олинган. Ва албатта рамзий терма жамоага киритилган.

ЖЧ-2002. Финал. Германия - Бразилия 0:2. Роналдо ўша финалда дубл қайд этган. Бутун мусобақа давомида эса 8та гол билан тўпурар бўлиш билан бирга рамзий терма жамоага ҳам киритилган.

2002 йилги финалдан кейин афсонавий Роналдони футбол қироли ҳисобланган бошқа бир афсона Пеле табрикламоқда.

ЖЧ-2006. Финал. Италия - Франция 1:1 (пенальтилар серияси - 5:3). Матерацци ўша финалда Италия учун ҳаммадан ҳам фойдали футболчи бўлган. Ўйинда Зиданнинг 7 дақиқада пенальтидан киритган голига 19 дақиқада жавоб қайтарган ва ҳисобни тенглаштирган. Кейин эса ўйиндан кейинги пенальтилар сериясида ҳам гол урган ва ...

Ва Франциянинг асосий юлдузи Зинедин Зиданнинг қизил карточка олишига сабабчи бўлган. Раҳматли Хожибой Тожибоев айтиб кетгандай, Зиданнинг "калласи"ни ҳозиргача ҳамма эслаб туради.

ЖЧ-2010. Финал. Голландия - Испания 0:1. Ўша йили Уэсли Снейдер "Олтин тўп"ни олиш учун энг муносиб футболчи эди. У "Интер" билан Чемпионлар лигасида ғолиб чиққан, кейин Жаҳон чемпионатида Голландия билан кумуш медалларини қўлга киритган. Ҳар икки фронтда ҳам Снейдер энг асосий етакчи ролини бажарган. Мундиалда 5та гол урган ва рамзий терма жамоага ҳам киритилган.

ЖЧ-2014. Финал. Германия - Аргентина 1:0. Ўша пайтда "Интер"нинг асосий таркибида тўп тепган Паласио терма жамоада захирадан ўйинга қўшиладиган футболчи бўлган.

Бу сурат эса бонус сифатида ;)

GettyImages суратлари ва FourFourTweet маълумотлари ёрдамида Толибжон Қосимов тайёрлади