"Zomin" - "Yozyovon" uchrashuvi oldidan

Ushbu mavsumda jamoalar o'rtasida o'tkazilgan dastlabki uchrashuvga “Yozyovon” mezbonlik qilgan. PRO-Liga 7-turida o'tkazilgan  uchrashuvning 11-daqiqasida Zohidbek Ismoilov tomonidan kiritilgan yagona gol tufayli “Yozyovon” jamoasi kichik hisobda g'alaba qozongan edi.

Joriy mavsumda har ikki jamoa ko'rsatayotgan o'yin ko'pchilikda qiziqish uyg'otdi. Sababi ushbu jamoalar ishtirokida o'tkazilayotgan har bir uchrashuv keskin kurshlarga boy tarzda o'tmoqda. PRO-Liga 11-turida “Yozyovon” o'z maydonida “G'ijduvon”ni 3:1 hisobida mag'lub etgan bo'lsa, “Zomin” safarda “Xotira 79” klubi mehmoni bo'lib, xuddi shunday hisobda mag'lub bo'ldi.

Biz qiziqarli o'tishi kutilayotgan “Zomin” - “Yozyovon” uchrashuvi oldidan mehmon jamoa sardori, jamoalar o'rtasidagi dastlabki uchrashuvda kiritilgan yagona gol muallifi Zohidbek Ismoilov fikrlari bilan qiziqdik.

“Zomin” juda yaxshi shakllangan, ilgarigi “Birinchi liga” bahslarida ko'p uchrashuvlar o'tkazgan tajribali jamoa hisoblanadi. Ushbu mavsumda ham “Zomin” jamoasi PRO-Liga bahslarida munosib ishtirok etib kelmoqda. Biz “Zomin”ga qarshi safarga ochko ulashish uchun bormayapmiz, albatta maydonga g'alaba uchun tushamiz. Bu yilgi mavsumda “Zomin”jamoasi bilan o'tkazilgan dastlabki uchrashuvda biz g'alaba qozongandik. Nasib qilsa ushbu uchrashuvdan keyin yaxshi kayfiyat bilan uyga qaytamiz", - deydi Zohidbek Ismoilov. 
 

PRO-Liga. 12-tur.
“Zomin”- “Yozyovon lochinlari”.
Hakamlar: R.Lutfullin, A.Abdullaev, F.Yo'ldoshev.
Nazoratchi: A.Tambovcev.
Komissar: M.Saidqosimov.

Eslatib o'tamiz, ushbu uchrashuv 3-iyun, yakshanba kuni “Zomin” o'yingohida bo'lib o'tadi. Uchrashuvning boshlanish vaqti soat 17:30ga belgilangan.

Bekzod TOLIBOV tayyorladi.