Zohir Pirimov: "Pas"ni ko'riboq zarba berish haqida o'yladim"

"Albatta, bir jamoa safida uzoq muddat to'p tepishni hamma futbolchi ham istaydi. 2008 yil jamoaga taklif qilinganimdan beri klubda murabbiy o'zgarmadi. Aynan shu omil muvaffaqiyat garovi bo'ldi deb aytgan bo'lardim. Boisi murabbiy almashaversa ham futbolchining o'yinida o'zgarish bo'lishi mumkin. Undan tashqari, menga ishonishdi", - deydi "Olmaliq" safida 150 uchrashuvni o'tkazgan Pirimov.

- Buni murabbiy ham aytib o'tdi, faoliyatingizga nazar tashlasak, doim barqaror o'ynay olmayapsiz. Bunga nima sabab bo'lyapti?

- To'g'ri, buni tan olaman. Mavsum boshida biroz ortda qolaman va yaxshi holatga kirishda qiynalaman. Sal vaqt o'tgach, suratga tushib olaman. 

- O'yinni zaxiradan tushib, davom ettirdingiz. Zaxirada o'tirgan paytingiz "Qo'qon-1912"ning ojiz nuqtalarini ko'ra olganmidingiz?

- SHunday desa ham bo'ladi. "Qo'qon-1912" o'z jarima maydonchasi ichida juda ham zich o'yin namoyish etayotgan edi. Himoya va darvozabon ancha yaxshi harakat qildi. 

- Golga qanday sharh berasiz? 

- Yana 100ta shunday imkoniyat bo'lsa ham bunday gol urish qiyin. Pavlenko to'pni havolatib oshirganidan keyin uni oyog'imga to'g'ri tushishini his qildim va o'ylab o'tirmasdan darvozani nishonga oldim. Agar zarbani posbon qaytarganida ham uni ushlab olishi qiyin bo'lardi, biron futbolchiga tegib gol bo'lishi mumkin edi. Lekin unga hojat qolmadi.

 Nodirxo'ja Yuldashev