"Yunired" klubi "Dinamo" muxlislariga murojaat qildi

"Biz o'zbek futbolini "Dinamo" klubi bilan tanidik, unga muxlislik qildik va bundan keyin ham "Dinamo"ning qolgan jamoalarga qarshi o'yinlarida Sizlar bilan bir qatorda turishimizga ishonamiz. 

Biroq Samarqand derbisi bundan mustasno. Biz yaxshi niyatlar bilan Samarqand futboli rivojiga kichik hissa qo'shish uchun klub tashkil qildik. Bugungi kunda "Yunired" "Dinamo" bilan bir ligada raqobat olib borayotgani bizni faxrga to'ldiradi. Biz o'zaro samimiy raqobat orqali viloyat futbolini yangi bosqichga olib chiqish uchun bir safda mehnat qilishga tayyormiz. Ikki kun avval buni maydonda ham isbotlashga urinib ko'rdik. 

Bilasizmi, "Yunired" klubi o'quvchi va talaba yoshlarni sport bilan do'stlashtirish uchun tashkil etilgan. SHundan kelib chiqib, klub muxlislari ham asosan o'quvchi yoshlarni, yani, uka va singillaringizni, o'qituvchi ayol va qizlarimizni tashkil etadi. Biz ularni futbolga qiziqtirish, sog'lom turmush tarziga ko'niktirish umidi bilan "Dinamo" stadioniga boshlab boramiz. Ammo, afsuski, ayrim futbol muxlislarining haqoratomuz so'zlari, so'kinishlari va hatto tahdidlari qarshisida qolamiz. "Dinamo"ga qarshi uchrashuv davomida bu kabi hunuk holatlar juda ko'p bor takrorlandiki, ayrim o'quvchi yoshlarda futbol stadioniga nisbatan mehr emas, nafrat shakllanishni boshladi. Biz bundan cheksiz afsusdamiz. 

Hurmatli muxlislar, biz Liga orqali sizdan bir narsani iltimos qilib qolamiz: atrofingizdagi insonlarga akangiz, ukangiz, singlingiz, opangiz, o'g'il yoki qizingiz kabi muomalada bo'ling! Biz maydonda jiddiy raqobat hosil qilishga, Samarqand futboli rivojiga birdek hissa qo'shishga, har qanday raqibga qarshi tik turishga tayyormiz. Uning atrofida esa sog'lom raqobat va samimiyatni unutmaslikni istaymiz. Bizni to'g'ri tushunishingizdan umidvormiz.

Hurmat bilan samarqandlik yoshlarni o'zida birlashtirayotgan va endigina katta futbolga kirib kelayotgan "Yunired" futbol klubi", - deb yozadi klub matbuot xizmati.