“Yoshlik” jamoasi – Xorazm viloyati hokimi kubogi sohibi

Viloyat  markazida qad rostlagan muhtasham “Yoshlik” sport majmuasi o'yingohida tashkil etilgan musobaqada vohaning 13 ta jamoasi qatnashdi. Dastlabki bosqich o'yinlari 4 guruhda olib borildi. Guruh g'oliblari esa yarim final juftliklarini hosil qilishdi.

Yarim finalning dastlabki bahsida Sport o'yinlari va engil atletikaga ixtisoslashtirilgan bolalar va o'smirlar sport maktabining “Yoshlik” jamoasi joriy yili bo'lib o'tadigan “Barkamol avlod” sport o'yinlariga tayyorgarlik ko'rayotgan “Barkamol avlod-2017” jamoasini 3:2 hisobida mag'lubiyatga uchratdi. Keyingi uchrashuvda esa Hazorasp tumanining “Jayhun” jamoasi Urganch shahridagi 5-son futbol bo'yicha ixtisoslashtirilgan maktab-internati futbolchilarini  3:0 hisobida engdi.
Natijada, “Yoshlik”(murabbiyi Vali Sultonov) va “Jayhun”(SHonazar Rahmatullaev) jamoalari hal qiluvchi uchrashuvda o'zaro bahs yuritdi. Ushbu o'yinning asosiy vaqtida g'olibni aniqlashni imkoni bo'lmadi, 2:2. Qo'shimcha vaqtda biroz faol  harakat qilgan V. Sultonov shogirdlari raqiblari darvozasiga yana bitta to'p kiritib, “Yoshlik” jamoasining 3:2 hisobdagi g'alabasini taminlashdi. G'olib jamoa safidan to'plarni Bahodir Rahimov, Temur Bekchanov, Habibulla Matyoqubovlar kiritishdi.

- Jamoamizning yutug'idan juda mamnunmiz, - deydi Sport o'yinlari va engil atletikaga ixtisoslashtirilgan bolalar va o'smirlar sport maktabi direktori Jamoladdin ABDULLAEV. – Albatta, ushbu muvaffaqiyatda murabbiylarimizning munosib hissasi bor. Nasib qilsa, mazkur yutuqdan ruhlangan holda iqtidorli futbolchilarni voyaga etkazish yo'lidagi izlanishlarimizni davom ettiraveramiz.

Musobaqaning yopilish marosimida “Yoshlik” jamoasi Kubok va sovg'alar bilan taqdirlandi.

Ikrom  XUDOYBERGANOV.