Vitaliy Denisov: "Yubiley o'yinimda g'alaba qozonganimiz ajoyib bo'ldi"

- Iroqqa qarshi o'yin haqida nima deya olasiz? Bugun siz uchun terma jamoa safidagi yubiley 50-o'yin bo'ldi.
- Albatta, milliy terma jamoa tarkibida 50ta uchrashuvda maydonga tushish yaxshi ko'rsatkich. Yubiley o'yinimda g'alaba qozonganimiz ham xursand qilmay qo'ymaydi. Bahsga kelsak birinchi bo'limda ustunlikka ega bo'ldik. Faqat darvozamizga penalti belgilangan vaziyatni hisobga olmasak, qolgan vaziyatlarda biz to'pni nazorat qildik. Juda ko'plab vaziyatlarga ega bo'ldik, ikkita-uchta gol urishimiz mumkin edi. Ikkinchi bo'limda raqib esa katta kuch bilan hujumga o'tishdi. Yigitlar biroz charchab qolishdi, balki zaxiradan tushgan qaysidir futbolchilar o'yinga qo'shilib keta olishmagandir. Umuman olganda biz uchrashuvda birinchi raqam ostida o'ynadik.

- Ikkala bo'lim oxirida himoyada qandaydir sarosima bo'ldi. Bunga sabab nima?
- Bo'lib turadi. Bazida hushyorlik yo'qotiladi, buyuk klublar futbolchilari ham shunday xatolarga yo'l qo'yib turishadi. Umuman olganda yaxshi o'yin o'tkazdik deya olaman.

- Hakamlik borasida nima deya olasiz?
- Agar Iordaniya bilan o'yin bilan taqqoslasak bugun hakamlar juda yaxshi ishlashdi. Osiyo hakamlar uchun juda ham kam uchraydigan holat kuzatildi. Ular bizga o'ynashga imkon berishdi. Hakamlar ishida to'liq qoniqdim.

 
Nodirxo'ja Yuldashev
Dubay