Urganch shahar hokimi kubogi sohibi aniqlandi

Urganch shahar hokimligi, “Sog'lom avlod uchun” xalqaro xayriya jamg'armasi viloyat bo'limi, O'zbekiston "Milliy tiklanish" demokratik partiyasi Urganch shahar tashkiloti, Urganch shahar xalq talimi  muassasalari  faoliyatini metodik taminlash va  tashkil etish bo'limi, “Kamolot” yoshlar ijtimoiy harakati Urganch  shahar kengashi va Futbol federaciyasi Urganch shahar bo'limi  hamkorligida “Tayanchim va suyanchim, faxru iftixorimsan, muqaddas Vatan!” shiori ostida o'tkazilgan mazkur musobaqada 30 ta maktab jamoasi ishtirok etdi.

Hal qiluvchi uchrashuvda Urganch shahrining  5-sonli va 7-sonli umumtalim maktablari jamoalari o'zaro bahs yuritdi. Ushbu o'yinda Zohidjon Ibrohimov ustozlik qilayotgan 5-son maktabning yosh “charm to'p” ustalari raqibidan ancha mahoratli ekanligini isbotladi. Ular raqib  jamoasini 6:1 hisobida mag'lubiyatga uchratib, Urganch shahar hokimi kubogini qatorasiga beshinchi marta qo'lga kiritishdi. Natijada, 7-sonli maktab jamoasi shohsupaning ikkinchi pog'onasini egalladi. Urganch tumanining 2-sonli va 12 - sonli maktab futbolchilari uchinchi o'ringa loyiq ko'rildi.

Musobaqaning “eng yaxshi”lari nomiga Jasur Sadullaev(darvozabon, Urganch tumani 2-son maktab), Siroj Tojiev(himoyachi, Urganch tumani 12-son maktab), Habibulla Matyoqubov(hujumchi, Urganch shahri, 5-son maktab) va Zohidjon Ibrohimov(murabbiy, Urganch shahri, 5-son maktab)lar sazovor bo'ldi.

Yakunda g'olib va sovrindor jamoalar hamda nominaciyalar bo'yicha “Eng yaxshi”lar tashkilotchilar tomonidan tegishli darajadagi diplom va sovg'alar bilan taqdirlandi.

Ikrom  XUDOYBERGANOV,