Umarali Rahmonaliev: "Bizni qiynab kelayotgan muammoga yana duch keldik"

"O'yin qizg'in ruhda o'tdi. Jamoamiz hujumkor o'yin ko'rsatdi. Bizni qiynab kelayotgan muammoga yana duch keldik, yani vaziyatlarni yakuniga etkazishda oqsadik. Ushbu kamchiligimiz ustida ishlashga to'g'ri keladi. Ushbu nuqson o'yin davomida ham bizga pand berdi. Keyingi o'yinlarda vaziyatlardan maksimum foydalanishga harakat qilamiz. Raqibning shunday o'yin namoyish etishini kutgandik va jamoamiz bilan tayyorgarlik ko'rgandik. CHunki raqib jamoa hisobida uch ochko mavjud edi va ularni durang ham qoniqtirardi. SHu sababli, Yangi Zelandiya himoyaviy o'yin ko'rsatishi ayon edi. Ikkinchi bo'limda ular shunday o'yin namoyish etishdi ham. 

Otabek Boymurodov bor mahoratini ishga solgan holda harakat qilmoqda. Unga hech qanday shikoyatimiz yo'q. To'g'ri, o'tkazib yuborilgan birinchi golda nimadir qilishi mumkin edi, biroq ikkinchi golni qaytarishning imkoni yo'q edi. CHunki raqib futbolchisi tomonidan tepilgan to'p olis burchakka yo'llangan edi. 

Yangi Zelandiyaning himoyaga tayanib zichlashgan holda harakat qilishi, qolaversa, qarshi hujumlarga chiqish holatlarini yuqori baholayman", dedi yoshlar jamoamiz sardori.