Uddalab bo'lmas "missiya"
09 may 2021 14:46
Yangiliklar
"Jo'jani sanash" vaqti kelgan top-ligalarda musobaqada qolish, sovrinli o'rinlar va xalqaro maydon chiptalari uchun kurash tobora avj olyapti. Jumladan, A Seriyada ham. Italiya chempionatining yakuniga qadar 4 tur qoldi. Garchi chempion nomiga allaqachon oydinlik kiritilgan bo'lsa ham, kumush medalning o'zi uchun hamon 5 jamoa ("Napoli", "Atalanta", "Yuventus", "Milan", "Lacio") kurashni davom ettirmoqda.
Xabaringiz bor, mavsum avvalida "kesakdan olov chiqargan" Stefano Piolining "rossonerilar"i 2-davraga kelib "puf etib o'chib qoldi". Yil boshida Milan osmonidagi bulutlar tarqagani, "qizil-qoralar" nihoyat "Yuventus"ning Apennin yarim orolidagi gegemonligiga barham berishi taxmin qilinayotgan edi. Biroq, ayni paytga kelib oydinlashdiki, bulutlar shaharning faqat ko'k tomonini tark etgan ekan. Qizil tomon esa osmon musaffolashishini yana bir muncha kutishga majbur bo'lyapti.
Ancha muddat A Seriya karvoniga boshchilik qilgan "rossonerilar" ayni daqiqada turnir jadvalida 5-bo'lib turishibdi. "Milan" qolgan 4 turda 100% lik natija qayd eta olsa, mavsumni 2-o'rinda; ularning birida qoqilsa, 6-o'rinda yakunlashi mumkin. Raqiblar esa ancha jiddiy: "Yuventus", "Torino", "Kalyari" va "Atalanta".
Bir paytlar Evropa maydonlarini titratgan "Milan" 2013 yildan CHempionlar Ligasiga chiqish vazifasini uddalay bilmayapti. Pioliga qadar bunga 7 nafar murabbiy harakat qilib ko'rdi (Zeedorf, Inzagi, Mixaylovich, Brokki, Montella, Gattuzo, Jampaolo), ammo bu vazifa hamon uddalanmadi. "Rossonerilar" "uddalanmadi" felidagi bo'lishsizlik shaklini olib tashlashni istasa, 1-navbatda bugun Andrea Pirloning "Yuve"sini tor-mor etishi kerak. Biroq...
... Stefano Piolining "Yuventus"ga qarshi o'z hikoyasi bor. Bu hikoyada eng ko'p ishlatilgan so'z esa yuqorida aytganimiz — uddalanmadi. Turinliklar qarshisida uning tizzalariga qaltiroq kiradi. Italiyalik mutaxassis murabbiylik faoliyati davomida "keksa sinora" bilan 22 bor to'qnash kelgan va ularning faqat 1 tasida g'alaba qozongan. SHu tufayli Pioli bugun "Missiya nevypolnima" filmida Tom Kruz jonlantirgan qahramonga aylanib, "missiya"ni uddalashi kerak. Aks holda, "qizil-qoralar" kelasi mavsumni ham ECHLsiz o'tkazib yuborishadi.
Juventus |
Serie A . 35-tur 09/05/2021, 23:45 3
:
0
Tugadi
|
AC Milan Brahim Diaz - 45', Ante Rebic - 78', Fikayo Tomori - 82' |
Stadion: 0 tomoshabin
Bosh hakam: Paolo Valeri
O’xshash yangiliklar
![AMP Logo](https://championat.asia/image/logo-amp.png)
Fikrlar