Terma jamoa sobiq futzalchisi Abdulla Solihov: "Etakchi futzalchilarning yo'qligi jamoa o'yiniga o'z tasirini ko'rsatmay qolmaydi"

Mundial haqida

- Bu yilgi mundial tarixdagi eng yaxshisi, shuningdek, eng qiziqarli va kutilmagan natijalarga boy bo'ladi, deb umid qilaman. Mundial o'z yurtimizda bo'layotgani futzalning ommalashiga, ushbu sport turining rivojiga katta turtki beradi va ichki chempionatimizga bo'lgan etibor yanada yaxshilanishiga, g'oliblik uchun raqobat kuchayishiga olib keladi. Jamoamiz eng kamida guruhdan keyingi bosqichga chiqib, avvalgi natijani yaxshilashini kutayapman, bunga kuchimiz etadi.

Jarohatlar haqida

- Jarohat olib safdan chiqqan futzalchilar terma jamoamizda o'z orniga ega kuchli o'yinchilar hisoblanishadi. Jarohat sportchi bilan doimo yonma-yon yuradi. Barchalariga sog'lik tilayman. Albatta, ularning yo'qligi jamoa o'yiniga o'z tasirini ko'rsatmay qolmaydi. Lekin jamoamizda hozirgi vaqtdagi eng kuchli tarkib yig'ilgan va buni ular, albatta, isbotlashadi, deb o'ylayman. Jamoamizga omad tilayman, nasib qilsa, tarixiy natijaga erishamiz va yaxshi uchrashuvlar guvohi bo'lamiz.

Sog'ligidagi muammolar sabab faoliyatini yakunlagani haqida

- Bizning emas, Yaratganning aytgani sodir bo'ladi. Albatta, bu holat kayfiyatimni tushirdi. Lekin nima bo'lganda ham, barchasi yaxshilikka xizmat qiladi. Bizga nima yaxshi-yu yomonligini faqat Yaratgan biladi. Hozirgi paytdagi holatim alo darajada, kelajakda esa murabbiy bo'lishi niyatim bor. Nasib qilsa, buni vaqt ko'rsatadi.