Tayyormisiz, unda boshladik!

Futbol uchrashuvlari muxlislarsiz o'tkazilib boshlanganida ham umid bor edi ko'pchilikda. O'tgan yilning 17 mart kuni esa musobaqa rasman kelasi yilga qoldirilishi elon qilindi. Oradan 1 yil juda ham tez o'tib ketdi va mana bugun nufuzli musobaqa start oladi. 

Bu safar avvalgilaridan boshqacharoq. Men ko'rgan Evro-2012 ikkita davlatda, 2016 yilgi musobaqa esa birgina mamlakatda o'tkazilgan. Evro-2020(21)ning ajablanarli tomoni turnir 11 shaharning 11 stadionida bo'lib o'tadi. 

Terma jamoalarning ham barchasi shay bo'lib ulgurgan. Ushbu turnirda aynan qay bir terma jamoa g'olib bo'lishini oldindan taxmin qilish qiyin desam ajablanarsiz, lekin gapning rosti shu. Men 10 yoshgina bo'lgan Polsha va Ukraina maydonlarida o'tkazilgan 2012 yilgi musobaqadan avval futbol jurnalistlari, mutaxassislari qaysi terma jamoani favorit sanagan-u, turnirda kim g'alaba qozonishini taxmin qilgani menga qorong'u. Akam 2010 yildan beri muxlis bo'lgan Ispaniya terma jamoasiga, men esa Portugaliyaga muxlislik qilganman. Guruh bosqichida Germaniya va Portugaliya terma jamoalari o'rtasidagi bahsda Mario Gomesning bosh bilan urgan goli hali hamon yodimda. Balotellining Germaniyaga urgan golidan keyingi harakati, zaxiradan maydonga tushib urgan gollari evaziga to'purar bo'lgan Fernando Torres – mening o'sha turnirdan yodimda qolganlari. 

Evro-2016 da siz Portugaliyaning chempion bo'lishini taxmin qilganmidingiz? Katta ehtimol bilan yo'q. O'sha vaqtlarda endi kuchayib kelayotgan Franciya turnirda favorit sanalgan, 2014 yilgi Jahon chempioni sifatida turnirga borgan Germaniyadan ko'p narsa kutilgandi. Payet va Ronalduning to'qnashuvi, Polsha va Uelsning turnirdagi ishtiroki ishoning ko'pchilik uchun kutilmagan hol bo'lgandi. 

Bugun 5 yil kutilgan musobaqa boshlanishini intiqlik bilan kutib turibmiz. Ushbu turnirdan ham yorqin xotiralar, yangi kashfiyot futbolchilar (agar Renatu Sanshesh kabi yo'qolib ketmasa keyinchalik) chiqadi. Deyarli barcha futbol ixlosmandlari ushbu turnida ko'p ehtimol biror terma jamoaga muxlislik qilishadi. Men esa mazkur Evroni faqat va faqat “azart” uchun ko'raman. 

P.S.: “Evro-2020 kundaligi”, o'yinlardan matnli translyaciyalar, qiziqarli statistik malumotlar, turli ko'rsatuvlarning barchasi – “Championat.asia”da! (reklama berish istagi borlar uchun bu erda batafsil malumot bor)