Superliga-2021. Barchasi murabbiylar haqida (1-qism)
01 mar 2021 11:10
Yangiliklar
![](https://championat.asia/upload/storage/622718_original.jpg)
![](/upload/storage/622718_220.jpg)
Superliga-2021. Barchasi murabbiylar haqida (1-qism)
Biz esa chempionat startidan avval 14 nafar murabbiy haqida fikr yuritishni lozim deb topdik.
Bosh murabbiy: Piter Xyuistra
Klubi: "Paxtakor"
Tug'ilgan sanasi: 18.01.1967
Fuqaroligi: Niderlandiya
Ortda qolgan davr mobaynida "Paxtakor"ni Osiyoning raqobatbardosh jamoasiga aylantirgan SHota Arveladze bu yildan etiboran bosh murabbiylik postini yordamchisi, niderlandiyalik Piter Xyuistraga topshirdi. 1967 yilda tug'ilgan ushbu mutaxassis bunga qadar bosh murabbiy lavozimida Niderlandiyaning "Groningen" (yoshlar) "Yong Ayaks", "Groningen", "De Grafsxap" hamda Indoneziyaning "Madura Yunayted" klublarida faoliyat olib borgan. "Paxtakor" uning bosh murabbiyligidagi oltinchi jamoa hisoblanadi. 3,5 yil ichida SHota Arveldaze bilan birga qator sovrinlarga ega chiqqan Xyuistra endilikda mustaqil o'zi bu ishni yana bir bor uddasidan chiqishga urinib ko'radi. Murabbiy yuqori pressingga asoslangan hujumkor uslubni yaxshi ko'radi. Bu yil ham "Paxtakor" futbolchilari ijrosida har bir uchrashuvda ochiq va hujumkor futbol guvohiga aylanamiz. Garchi uning falsafasiga mos keladigan Jaloliddin Masharipov, Doston Hamdamovlar jamoani tark etgan bo'lsada, yangi qo'shilganlar ketganlarning o'rnini bilintirmasligiga ishonaman. Sardor Rashidov, Aziz Turg'unboev kabi hujumkor vingerlar bilan Xyuistra bemalol o'zi istagan o'yinni yo'lga qo'ya oladi. Niderlandiyalik mutaxassis boshchiligidagi "sherlar" joriy mavsumda chempionlik yo'lida yaqqol favorit sifatida tilga olishimiz mumkin.
Bosh murabbiy: Ro'ziqul Berdiev
Klubi: "Nasaf"
Tug'ilgan sanasi: 22.10.1971
Fuqaroligi: O'zbekiston
Mana bir necha yildirki, qanday tarkib bo'lmasin, qanday vaziyat yuzaga kelmasin barqarorlikni saqlab qolishni uddasidan chiqayotgan "Nasaf" bosh murabbiyi Ro'ziqul Berdiev bu yil ham barchaga bosh og'riq bo'lishi kutilmoqda. Futbolchilik faoliyatida ham jamoaga sodiqligini ko'rsata olgan Ro'ziqul Sadullaevich murabbiylikda ham buni isbotlamoqda. 2012 yildan boshlab "ajdarlar"ga ustozlik qilib kelayotgan mutaxassis mana shu davr ichida O'zbekiston kubogi, mamlakat Superkubogi, chempionatda bronza va kumush medallariga ega chiqdi. 2018, 2019 yilgi mavsumlarda medallardan chetda qolgan jamoa o'tgan mavsumda yana sovrindorlar safiga qaytdi va ikkinchi o'rinni o'ziniki qildi. Bunda joriy yilda yubiley 50 yoshni qarshi oladigan Ro'ziqul Berdievning hissasi katta bo'ldi. "Nasaf" o'z uslubini o'zgartirmagan holda bu mavsum yuqori o'rinlar uchun kurashadigan jamoalarga raqobat tug'dira olishi shubhasiz.
Bosh murabbiy: Mirjalol Qosimov
Klubi: AGMK
Tug'ilgan sanasi: 17.09.1970
Fuqaroligi: O'zbekiston
Odatda faoliyat olib borgan jamoalarida sovrin yutishga odatlangan Mirjalol Qosimov bu ananani AGMKda ham davom ettirdi. Olmaliqliklar 2020 yilgi mavsum yangi tarix yarata oldi va bronza medallariga ega chiqdi. 51 yoshlik mutaxassis jamoadagi ilk yilida biroz qiynalganiga qaramay o'yinni to'g'ri yo'lga qo'ya oldi va jamoani medallar uchun kurashadigan holatga keltirdi. Qaysidir manoda g'oliblik ruhini singdira oldi. Qishki transferlar oynasi vaqtida tarkibga bir nechta tajribali va mahoratli ijrochilarni qo'shib olganidan ushbu mavsumda AGMKning chempionlik uchun kurashishini kutib qolamiz. Moliyaviy tomondan ham boshqa jamoalarga qaraganda ancha barqaror bo'lgan «konchilar» tarkib jihatdan qisman «Paxtakor»ga tenglashib oldi. Demak, AGMKning hozirgi harakatidan bilish mumkinki, oltin medal uchun bu yil raqobat ancha jiddiy kechadi. «Bunyodkor» bilan bir necha bor chempionlik va kubokda g'olib chiqqan, ikki bor OCHL yarim finaliga etib borgan Mirjalol Qosimov AGMKda ham bu ishni qila olishiga ishonchimiz komil. Zero, maestro tabiri bilan aytganda bronza medal endilikda muxlislarni va rahbariyatni qoniqtirmaydi.
Murabbiy: Marat Miftaxutdinov
Klubi: "Bunyodkor"
Tug'ilgan sanasi: 02.01.1962
Fuqaroligi: O'zbekiston
Vadim Abramov bundan buyon bor etiborini milliy terma jamoaga qaratishni boshlagach "Bunyodkor"ni Marat Miftaxutdinov va SHuhrat Maqsudov juftligi boshqarmoqda. Garchi hozirgacha bosh murabbiy nomi rasman elon qilinmagan bo'lsada, aksariyat hollarda Marat Valentinovich murabbiy sifatida ko'rsatilmoqda. Bungacha asosan Vadim Abramovga "Lokomotiv", "Neftchi" jamoalarida yordamchi vazifasini bajargan. SHuningdek malum vaqt "Mashal" jamoasida faoliyat olib borgan. Yana bir malumot Marat Miftaxutdinov hozirda 59 yosh bilan chempionatimizdagi eng yoshi katta murabbiylar qatorini boshqarib turibdi. Jamoaning ayni paytdagi tarkibini yomon, deb bo'lmaydi. Tarkibning o'zagi saqlanib qolingan. SHuningdek bir necha futbolchilar ham kelib qo'shildi. Islom Qobilov, Sanjar Qodirqulov, Abdumavlon Abdujalilovlarni o'rni bilinmaydi, deb o'ylayman. CHunki, ularning o'rniga kelgan futbolchilar ham yaxshi saviyada. Bu esa murabbiylik faoliyatida mustaqil qadam qo'yayotgan Marat Miftaxutdinovga bir muncha engillik beradi. Agarda tarkib butunlay yangilanganida balki qiyin bo'lardi. "Qaldirg'ochlar" hech qachon, hattoki juda qiyin paytda ham quyi o'rinlarni egallamagan. Demak, mazkur yil ham ular sovrinli o'rinlar uchun kurashishadi. "Bunyodkor"ning o'ziga xos ananasi, qadriyatlari borligini unutmaslik lozim.
Bosh murabbiy: Baxtiyor Ashurmatov
Klubi: "Qo'qon-1912"
Tug'ilgan sanasi: 25.03.1976
Fuqaroligi: O'zbekiston
Faoliyat olib borgan jamoalarida etarlicha vaqt berilmasligi va ishonchsizlikdan aziyat chekgan Baxtiyor Ashurmatov "Qo'qon-1912"da ana shu etishmayotgan omillarni topa oldi. Natijada bu murabbiyning muvaffaqiyat kaliti bo'la oldi. Elitaga qaytganidan beri ligada jon saqlab qolish uchun kurashgan qo'qonliklar Baxtiyor Ashurmatov davriga kelib yuqori o'rinlarni egallaydigan, etakchilarga raqobat tug'dira oladigan jamoaga aylandi. Jamoa bu yil ham o'tgan mavsumdagidan kam bo'lmagan natijaga intilishlari tabiiy. Har holda murabbiy ham jamoaga, futbolchilar esa murabbiyning uslubiga ancha moslashib ulgurdi. Quvondiq Ro'zievning ketishi esa Baxtyor Azamovichni tashvishlantirmasa kerak. Uning o'rnini mutaxassis mahalliy ijrochilar bilan to'ldirishiga ishonaman. Menimcha, "Qo'qon-1912" safida Anvar Hojimirzaev va Asadbek Sobirjonov Ashurmatovning topilmalaridan biri bo'ladi. 44 yoshli murabbiy AGMK bilan 2018 yil mamlakat kubogida g'olib chiqqan. Muxlislar Qo'qonda ham ana shunday tarix yaratilishini kutib qolishadi.
Bosh murabbiy: Andrey SHipilov
Klubi: "Metallurg"
Tug'ilgan sanasi: 23.03.1971
Fuqaroligi: O'zbekiston
Bekobodning "Metallurg" jamoasi 2018 yil Andrey SHipilov boshqaruviga o'tgach ancha barqaror natija qayd etib kelmoqda. Dastlabki ikki yilda kuchli beshlikdan o'rin olgan jamoa o'tgan mavsumda ettinchi pog'onadan o'rin egalladi. Natijalar yaxshilanish barobarida mahalliy yoshlarga, o'rinbosarlar jamoasiga etibor kuchaytirildi. Bunga qadar "Paxtakor", O'zbekiston milliy terma jamoasida Samvel Babayaning shtabida ishlagan qilgan SHipilovning mustaqil murabbiylik faoliyati chakki ketayotgani yo'q. "Metallurg" qishki transferlar oynasi vaqtida tarkibini sezilarli kuchaytirishga erishdi. Evgeniy Makeev, Nikita Pavlenko, Ivan Nagaev, SHahzod Nurmatov kabi futbolchilar qo'shib olindi. Andrey SHipilov jamoasining bu yilgi maqsadlari haqida shunday deydi: "Medallar uchun kurashishimiz haqida biror narsa deya olmayman. Bilasiz, ko'p narsa moliyaviy holatga bog'liq. Bizda byudjetimiz o'rtacha. Har qanday holatda ham kuchli beshlikka kirishga harakat qilamiz. Avvalgi yillarda 3-4 o'rinni egallagan jamoalar bilan ochkolarimiz o'rtasida katta farq bo'lmagandi. Qo'l ostimda oldiga maqsad qo'ygan yigitlar jamlangan",- deydi 49 yoshli Andrey SHipilov.
Bosh murabbiy: Ulug'bek Baqoev
Klubi: "So'g'diyona"
Tug'ilgan sanasi: 28.11.1978
Fuqaroligi: O'zbekiston
Odatda quyi o'rinlarda yuradigan "So'g'diyona" Ulug'bek Baqoev murabbiyligidagi so'nggi ikki mavsumda tepa va o'rta o'rinlarni egalladi. 2019 yilning may oyida jamoani qabul qilib olgan Baqoev o'sha yili bronza medallarini qo'lga kiritishga juda yaqin kelgandi. Keyingi mavsumda esa ikki pog'ona pastladi va oltinchi o'rinni egalladi. Bundan avval "Buxoro"da ham kurashuvchan jamoa tuza olgan 42 yoshli murabbiy muxlislarning mehrini qozonib ulgurgandi. Moliyaviy qiyinchiliklarga qaramasdan ko'hna shahar klubi bilan Superligada oltinchi va ettinchi o'rinlarni zabt etgandi. Jamoa qishki transferlar oynasi vaqtida u qadar faol bo'layotgani yo'q. SHunga qaramay Baqoev o'z jamoasini yuqori o'rinlar sari etaklay olishini taxmin qilamiz.
Davomi bor. Bizni kuzatishda davom eting!
Abdulaziz Iskandarov
O’xshash yangiliklar
![AMP Logo](https://championat.asia/image/logo-amp.png)
Fikrlar