SHerzod Hakimov: “Lokomotiv”ga qarshi o'yinda yo'qotishlar bor edi”

“Lokomotiv”ga qarshi baxsda farg'onalik hujumchi uzoq masofadan zarba yo'llagan xolda, raqib darvozasini chiroyli tarzda ishg'ol etdi. Ammo "Neftchi" yakunda mag'lubiyatga uchradi.

- “SA” talqiniga ko'ra 25-tur ramziy terma jamoasidan o'rin egalladingiz. Bundan xabaringiz bormi?
 - Yo'q endi sizdan eshitib turibman. Agarda shunday bo'lsa, bundan xursandman.

- Aslida har bir turdan so'ng berib boriladigan ramziy terma jamoani kuzatib borasizmi?
- Ha, albatta. Bu har bir futbolchi uchun qiziqarli bo'lsa kerak. Lekin “Lokomotiv”ga qarshi o'yindan so'ng ramziy terma jamoadan o'rin egallashimni kutmagandim.

- Toshkentdagi o'yinda uzoq masofadan zarba berib gol urdingiz. SHunda tavakkal qilganmidingiz yoki ishonch bormidi?
- Albatta gol urishga harakat qilganman. Ishonch ham bo'lgan.

- “Lokomotiv”ga qarshi uchrashuvda gol urishdan tashqari bitta golga assisentlik ham qildingiz. Umuman olganda shu kuni ko'rsatgan o'yiningizdan ko'nglingiz to'ldimi?
- O'yinimga munosib bahoni murabbiylar va muxlislar beradi. Lekin shaxsan o'zim qoniqdim deya olaman.

- Garchi jamoangiz ikki bor hisobda oldinga chiqib olgan bo'lsada, yakunda mag'lubiyatga uchradi. G'alabani saqlab qolish uchun nima etishmadi deb hisoblaysiz?
- To'g'ri, uchrashuv biz uchun avvaliga yomon boshlanmadi va birinchi bo'lib hisobni ochishga erishdik. Bilasizmi bu o'yinda asosiy tarkibning uch nafar azosi Sardor Rahmonov, Akmal Xolmatov va Sardor Mirzaev jamoaga yordam bera olmadi. CHunki ular davralar oralig'ida aynan “Lokomotiv”dan o'tishgandi. SHuning uchun o'zaro kelishuvga binoan ularning o'ynashiga ruhsat yo'q edi. 


Islombek Rustambekov