SHahboz Beg'amov: "Oybek Bozorov Osiyo chempionati kashfiyotlaridan biriga aylanishi mumkin"

"Yangi yildan keyin yanvarda har safar Osiyo chempionati bo'lishiga ko'nikib qoldi odam. Ikki yil avval Xitoyda yoshlar o'rtasidagi Osiyo chempionati o'tkazilgandi. O'tgan yil BAAdagi Osiyo Kubogi va bu gal Olimpiada yo'llanmasi o'ynalgani uchun ham qadri baland Osiyo chempionati boshlandi. Tailanddagi musobaqada Olimpiya terma jamoamiz ertadan muhim yo'lga tushadi. Avval ham aytganimdek, negadir ishonch yuqori va xotirjamman. Ha, guruh kuchli, bu haqida ortiqcha gapirishga hojat yo'q. Lekin bizning jamoa o'sha kuchli guruhning asosiy “bo'ri”laridan biri. Raqiblarimiz ichida eng kuchlisi — Janubiy Koreya. Keyingisi — Xitoy. Fikrimcha, nisbatan kuchsizi — Eron.

Eronda murabbiy qo'nimsizligi natijasida ham o'yin yaxshi emas. Tayyorgarlik ham ideal emas. Xitoy yaxshi jamoa, lekin qo'rqinchli emas. Janubiy Koreya zo'r, ha. Quvonarlisi, biz ular bilan oxirgi turda, ehtimol, barcha masala hal etilgach o'ynarmiz. SHu taraflama bu yaxshi.

Zo'r avlod, kvalifikaciyasi yuqori futbolchilar jamlanmasi asosiy tarkib borasida murabbiyda yaxshi manodagi “bosh og'riq”ni taqdim etishi aniq. G'aniev, To'xtasinov, Abdixoliqov, Yaxshiboev kabi futbolchilar chinakam etakchi bo'lishi kerak. Oybek Bozorov esa musobaqa kashfiyotlaridan biriga aylanishi mumkin. Eron bilan o'yinda ishonchli o'yin hamda yirik g'alaba kutyapman. Menimcha, qiynalmaymiz. Omad, yigitlar!" - deb yozdi SHahboz Beg'amov.