Sergey Lushchan: "Birinchi o'rin? Imkoniyatimiz bor albatta, lekin..."

Mazkur tur doirasida Farg'onaning "Istiqlol" klubi Samarqandning "Dinamo" jamoasini qabul qildi. Uchrashuvdan so'ng mehmonlar bosh murabbiyi Sergey Lushchan o'z fikrlarini bildirib o'tdi.

- Sergey Ivanovich, bugungi o'yin haqida fikrlaringiz qanday?
- Yaxshi o'yin bo'ldi. Har ikki jamoa ham oxirgi daqiqalargacha maydonda kurash olib bordi. O'yin taqdirini so'ngi daqiqalarda urilgan gol hal qildi. Yigitlar og'ir o'yin o'tkazishdi. Bugungi o'yinni Superliga sari bosilgan yana bir qadam deb hisoblasak bo'ladi. Jamoamiz futbolchilari oxirigacha kurash olib borishdi va yakunda g'alabaga erishdik. Muxlislarga manzur bo'ladigan tomoshabop o'yin bo'ldi.

- "Dinamo"ning PRO-Ligada birinchi o'rinni egallashi imkoniyatlarini qanday baholaysiz?
- Birinchi o'rin? Imkoniyatimiz bor albatta. Lekin buning uchun raqobatchilarimiz ko'rsatadigan natijaga ham etibor qaratishga majburmiz. Bizdan oldinda borayotgan jamoalar ochko yo'qotadigan bo'lsa, biz qolgan barcha o'yinlarni yutsak PRO-Ligada birinchi o'rinni qo'lga kiritishimiz mumkin. Bu juda qiyin bo'ladi. Albatta, bunga bor imkoniyatimizni ishga solib harakat qilamiz.

- Navbatdagi o'yin haqida nimalarni ayta olasiz?
- Keyingi o'yin haqida nima deyishim mumkin? Albatta, og'ir o'yin bo'ladi. "Turon" yaxshi shakllanib kelayotgan jamoa. Ular bejizga 3-o'rinni egallab turgani yo'q. Navbatdagi ikki uchrashuvimiz peshqadamlarga qarshi o'tadi. Aytib o'tganimdek, bizni qiyin uchrashuvlar kutib turibdi.

- "Dinamo"ning keyingi rejalari haqida nimalarni ayta olasiz?
- Biz yangi jamoa tuzmoqdamiz. Tabiiy xolda bunga ozroq vaqt kerak bo'ladi. Masalan, PRO-Liga peshqadami “SHo'rtan" jamoasi futbolchilari 2-3 yildan beri o'ynashmoqda. "Dinamo"ni raqobatbardosh va kurashuvchan jamoa etib shakllantirish uchun harakat qilmoqdamiz. Bugun kamida 3 ta yaqqol imkoniyatdan foydalana olmadik. Muhimi yakunda 3 ochko egasiga aylandik.

- Ayni damda Italiyaning "Jenoa" klubi tarkibida o'ynayotgan Eldor SHomurodov sizning shogirdingizmi?
- Yo'q, SHomurodov Muborakning "Mashal” klubi tarbiyalanuvchisi hisoblanadi. Biz Eldorni imkoniyatlarini ko'rib chiqib jamoamizga taklif etganmiz. SHomurodovga yangi jamoasida omad tilayman.

Bekzod Tolibov yozib oldi