Sergey Lushan: "Hammasi ijobiy yakun topganidan xursandman"

Jizzaxliklar Muborakning "Mashal" klubini 3:1 hisobida mag'lubiyatga uchratib, Superligada o'z o'rinlarini saqlab qolishdi. Bahs yakuniga etgach, "So'g'diyona" bosh murabbiyi Sergey Lushandan intervyu oldik.

- Qiyin o'yinni o'tkazdik. Buning ustiga pley-off bosqichining bitta uchrashuvdan iborat ekanligi ham o'z tasirini ko'rsatdi, - deya fikr bildirdi Sergey Ivanovich. - Raqib bizga jiddiy qarshilik ko'rsata oldi. SHu bois g'alaba qozonish oson bo'lmadi. Penaltidan gol o'tkazganimiz alam qildi. Lekin hammasi ijobiy yakun topganidan xursandman. O'yindan so'ng barchani g'alaba bilan tabrikladim va futbolchilarga 20 dekabrga qadar tatil berilishini aytdim. SHundan so'ng yana yig'ilib yangi mavsumga hozirlik ko'ramiz. Keyingi yil tarkibni kuchaytirmasak bo'lmaydi.

- "Mashal" qanchalik qarshilik ko'rsatdi?
- "Mashal" o'ziga xos ananalarga ega klub. Buni hamma biladi. Lekin bugun raqib emas, ko'proq biz o'zimiz o'zimizga muammo tug'dirdik.

- Bu yil Superliga o'zgacha formatda kechdi. Bu haqda nima deya olasiz?
- Men bu haqda ko'p gapirdim. Yangi format qanchalik foyda berishini vaqt ko'rsatadi. Oldin ikki-uchta chempionat shu tizimda o'tsin, keyin xulosa qilsa bo'ladi. Faqat bir narsani aytishim mumkin, jamoalar oltitalikka bo'linganidan keyin oxirgi ikkita tur qiziq bo'lmay qoldi.  

- Hozir shu formatni saqlab qolish yoki o'zgartirish haqida gap boryapti.
- Keyingi yil Superliga qanday tartibda o'tishini bilmayman. Lekin o'zim futbolchilik paytimda faqat ikkita davrali chempionatlarda o'ynaganman va shu format menga tushunarli edi. Format qanday bo'lmasin, chempionatda o'tkinchi o'yinlar bo'lmasligini xohlayman.

- "Oltin ochkolar" bizga kerakmi?
- To'g'risi, men bunday tizimda o'ynashga o'rganmaganman. Faqat shuni sezdim, "oltin ochkolar" bor joyda kimning qaerda bo'lishini oldindan taxmin qilsa bo'lar ekan. Men uchun eng maqul chempionat - 16ta jamoa ishtirokida ikki davrali tizim. Bu shaxsiy fikrim. Ammo yakuniy qarorni PFL qabul qiladi.

- Klub bilan tuzgan shartnomangiz xususida?
- SHartnoma muddati 30 noyabrga qadar edi va yaqinda tugadi. Hozir muzokaralar ketyapti. Hammasi rahbariyatning nima deyishiga bog'liq. Agar klub rahbari ishlayveringlar desa jamoada qolib ishimizni davom ettiramiz, mabodo aksi bo'lsa rahmat aytib ketishga to'g'ri keladi.

- Mavsum oxirida muxlislarga aytar so'zingiz?
- Avvalo hammaga sog'lik tilayman. Muxlislarimiz jamoaga ishqibozlik qilishda, futbolni sevishda davom etishsin. Men xohlardimki, keyingi yil chempionatning har bir o'yinida stadionlar to'lsa.

X.Xoliqov suhbatlashdi.