Saralashni yirik g'alaba bilan boshladik. Buyog'iga faqat omad!

Farhod Nishonov boshchiligidagi O'zbekiston U-20 terma jamoasi ilk turni Kambodjaga qarshi o'tkazib yirik hisobda zafar quchdi. Quyida ushbu saralash haqida bazi malumotlarni keltirib o'tamiz.

U-20 Osiyo kubogi 2025 yilning 6-23 fevral kunlari Xitoyda bo'lib o'tadi. Saralash bosqichida jamoalar 10ta guruhga bo'lingan bo'lib, har bir guruhdan g'olib jamoa va 5ta eng yaxshi ikkinchi o'rin egalari (jami 15ta jamoa) qita birinchiligiga yo'l oladi. O'zbekiston yoshlar terma jamoasi B guruhida joy olgan bo'lib, saralash bahslariga Xitoy Taypeyi mezbonlik qilmoqda.

Aytib o'tganimizdek, U-20 Osiyo kubogi saralash bosqichi 10ta guruhda olib boriladi. Bunda 2005 yil 1 yanvardan keyin tug'ilgan bolalar maydonga tushishi mumkin. Osiyo kubogi mezboni Xitoy saralashda ishtirok etmaydi. Guruhlar quyidagicha ko'rinish olgan.

A guruhi - Vetnam (mezbon), Suriya, Guam, Bangladesh, Butan.
B guruhi - Xitoy Taypeyi (mezbon), O'zbekiston, Kambodja, Bahrayn, Nepal.
C guruhi - Quvayt (mezbon), BAA, Janubiy Koreya, Livan, SHimoliy Mariana orollari.
D guruhi - Saudiya Arabistoni (mezbon), Avstraliya, Afg'oniston, Makau, Falastin.
E guruhi - Tojikiston (mezbon), KXDR, Malayziya, Ummon, SHri Lanka.
F guruhi - Indoneziya (mezbon), Yaman, SHarqiy Timor, Maldiv.
G guruhi - Laos (mezbon), Eron, Mo'g'uliston, Hindiston.
H guruhi - Tailand (mezbon), Iroq, Filippin, Bruney.
I guruhi - Qirg'iz Respublikasi (mezbon), Yaponiya, Myanma, Turkmaniston.
J guruhi - Qatar (mezbon), Iordaniya, Singapur, Gonkong.

B guruhida o'yinlar 21 sentyabr kuni start oldi va 29 sentyabr kuni oxirgi tur uchrashuvlari o'tkaziladi.

21 sentyabr. 1-tur
Nepal - Kambodja 1:4
Xitoy Taypeyi - Bahrayn 0:1

23 sentyabr. 2-tur
Kambodja - O'zbekiston 0:7
Nepal - Xitoy Taypeyi 3:1

25 sentyabr. 3-tur
O'zbekiston - Nepal
Bahrayn - Kambodja

27 sentyabr. 4-tur
Bahrayn - Nepal
Xitoy Taypeyi - O'zbekiston

29 sentyabr. 5-tur
O'zbekiston - Bahrayn
Kambodja - Xitoy Taypeyi

Guruhdagi barcha uchrashuvlar Fu Jen Universitet stadionida bo'lib o'tmoqda. Ko'rib turganingizdek, guruhimizdagi asosiy raqib - Bahrayn. Va katta ehtimol bilan guruh g'olibi masalasi 29 sentyabr kuni bo'lib o'tadigan O'zbekiston - Bahrayn bahsidan so'ng hal bo'ladi. Ungacha Bahrayn ochko yo'qotib, biz hamma o'yinlarda zafar quchsak, unda oxirgi turning ahamiyati qolmaydi. SHunday ekan, buyog'iga yigitlarimizga faqat omad tilab qolamiz.

X.Xoliqov