Samvel Babayan: "Biz bugun mag'lub bo'la olmasdik. Ushbu o'yinni Viktor Jalilovning xotirasiga bag'ishlaymiz"

O'yin haqida

- Bugungi o'yin eng qiziqarli, keng qamrovli o'yinlardan biri edi. Ikki katta klub bugun maydonga tushdi. Umuman olganda, hisob adolatli bo'ldi. Bu kabi teng kechgan o'yinda mag'lub bo'lish alamli bo'lishi mumkin edi. Biz ayniqsa ikkinchi taymda yaxshi o'ynashni boshladik. Qaysidir daqiqalarda ustunlik ham qildik. Birinchi taymda o'yinimiz qovushmadi. Ishlash kerak bo'lgan jihatlarimiz bor. Bugun to'qqizinchi tur bo'lsa, hali o'zimizning optimal tarkib bilan hali ham o'ynolmadik. Jarohatlar, diskvalifikaciya... Ishonamanki, tez orada to'liq tarkibda maydonga tushamiz. Yigitlarga mehnatlari uchun rahmat aytaman. Yana bir muhim jihat bor. Biz bugun mag'lub bo'la olmasdik. Ushbu o'yinni Viktor Jalilovning xotirasiga bag'ishlaymiz. O'zbekiston tarixidagi eng buyuk murabbiylardan biri. O'zidan juda ko'p narsa qoldirgan shaxs. Men uchun Viktor Jalilov ikkinchi otam kabi edi. Hayotimning katta qismida Viktor Jalilov menga ustozlik qilgan, yo'l ko'rsatgandi. Bugungi kunga qadar biz birga edik. O'zbek futboli, qolaversa, ularning yaqinlari uchun juda katta yo'qotish bo'ldi.

- Biz ham qashqadaryolik muxlislar, OAV xodimlari nomidan Viktor Jalilovning vafoti munosabati bilan ularning oila azolariga chuqur taziya bildiramiz. Biz ham u kishini bilardik. Viktor aka Muborakda faoliyat yuritganlar, Qashqadaryo futboliga ham ulkan mehnatlari singgan. O'yinga kelsak, bugun "Navbahor" g'alaba qozonishi uchun nima etishmadi?

- Bugun bizga birinchi taymda hujumdagi agressiya etishmadi. Birinchi 10 daqiqada biz raqibni juda kech kutib oldik. Biz boshida yigitlar bilan bunga kelishmagandik. Ikkinchi bo'limda Yaxshiboev maydonga tushganidan so'ng hujumimiz yaxshilandi. "Nasaf" himoyachilarining darajasi bizga hujumda yaxshi harakat qilishga imkoniyat bermadi. 

- "Navbahor" chempionatning dastlabki turlarida yorqin g'alabalar qayd etdi. Keyinchalik esa jamoa o'yinida pasayish bo'ldi. Bunga sabab nima?

- Pasayish bo'lmadi. SHunchaki, ikkita o'yinni yutqazib qo'ydik. Bu o'yinlarda g'alaba qozonishimiz kerak edi. "Paxtakor"ga qarshi o'yinda yoshbolalarcha gollar o'tkazdik, qo'shimcha daqiqalarda penaltini urolmadik. OKMKga qarshi o'yinni esa tushuntirib berish qiyin. Bu ikki o'yinda gap texnikada ham, taktikada ham emas. Biz bu o'yinlarda kurashda yutqazdik. Futbolimiz yaxshi. Bugun ham yigitlarga rahmat aytaman. O'yinchilarim bugun barcha kurashlarda yutib chiqishdi. Ayniqsa, ikkinchi qavatdagi kurashlarda. Biz bugun standart vaziyatlarda raqibga hech qanday imkoniyat qoldirmadik.

- Kecha "Paxtakor" g'alaba qozondi. Bugungi o'yin natijasi "Navbahor" uchun juda muhim hisoblanardi. SHu nuqtai nazardan olib qaralsa, bugungi natijadan qoniqdingizmi?

- To'g'risi, biz faqat g'alaba uchun maydonga chiqyapmiz. Bugungi natija adolatli bo'ldi. "Paxtakor"ga kelsak, bizda raqobatchilar ko'p. "Nasaf", "Neftchi" va hakazo. Bizga qarshi o'yinda hamma boshqacha tayyorlanib chiqadi. Har bir jamoa bizga qarshi boshqacha kayfiyatda, qo'shimcha ishtiyoq bilan o'ynamoqda. OKMK va "Paxtakor" boshqa o'yinlarda qanday kayfiyatda o'ynashayotgani va ularga bizga qarshi qanday ishtiyoqda maydonga chiqishayotganini ko'rdik.

- "Navbahor" oxirgi o'yinlarda o'zgartirishlarni kech va kam qilyapti. Bu asosiy tarkib futbolchilarini ko'p kuch yo'qotishiga va zaxiradagilarni o'yin amaliyotisiz qolishiga sabab bo'lmaydimi?

- Bilasizmi, zaxiradan o'yinni kuchaytiruvchi o'yinchi maydonga tushishi kerak. Bugungi o'yinda zaxira o'rindig'imizga etibor bersangiz, beshta futbolchidan ikkitasi U-17, yana ikkitasi U-20 terma o'yinchilari edi. Ular ham yig'inlardan yuklamalar olib kelishgandi. Bugun Boltaboev ham tarkibda yo'q edi. U umuman kerakmas joyda qizil olib, diskvalifikaciyaga uchragandi. Bugun Boltaboev bizga juda kerak bo'ldi. Milovich ham bugun o'ynamadi, Davron Hoshimov ham bugun bizga yordam bera olmadi. Zaxiradan faqat o'yin darajasiga mos o'yinchilar maydonga tushadi. 

- "Navbahor" asosiy raqiblarga qarshi o'yinlarda ochko yo'qotmoqda. Bu boshqa g'alabalarni yuvib ketmaydimi? Asosiy ayb kimda deb o'ylaysiz?

- Ayb o'zimizda. Hozir aytganimdek, "Paxtakor" va OKMK bilan 20 daqiqagina sust harakat qildik, kurashda yutqazib qo'ydik. Taktikada esa hammasi joyida. O'yin sifatida biz hech kimga yutqazmadik, ammo yuqorida sanalgan o'yinlarning bazi qismlarida kurashni boy berdik. 

- O'yindan oldin Viktor Jalilovning xotirasiga sukut saqlangan vaziyatda Championat.asia nashri ko'zyosh to'kayotgan holatingizni suratga muxrlab, buni ommaga elon qildi. Umuman maydon atrofida bugungidek holatni oxirgi marta qachon his qilgandingiz?

- Aytib o'tganimdek, Viktor Jalilov mening ikkinchi otam edi. Men uchun bu katta yo'qotish. Bu insonning oxirgi kunlarigacha qo'ng'iroqlashib turgandik. O'yin paytidagi holat esa toza emociyalar edi. Ertaga butun jamoa bilan Viktor Jalilovni oxirgi manzilga kuzatamiz. Bugungi o'yinda har bir futbolchimiz aynan Viktor Jalilov uchun borini berib harakat qildi.