Rustam Mirsodiqov: “Xorijda yig'in o'tkazish haqida quradan keyin o'ylab ko'ramiz”

- Rustam aka, malum muddatlik tatildan so'ng jamoalar tayyorgarlikni boshlamoqda. Sizning boshqaruvingizdagi “Metallurg” qachon yig'iladi?

- Rejamizga ko'ra 15 dekabr kuni yigitlarni yig'amiz. Yangi yil bayramiga qadar CHirchiqda tiklanish mashg'uloti olib boriladi. 

- Jamoangiz yangi mavsum oldidan xorijda ham yig'in tashkil etsa kerak?

- Bilasizmi, hozir bu haqda sizga aniq malumot bera olmayman. 17 dekabr kuni PFLda chempionat-2015 va O'zbekiston Kubogiga qura tashlash marosimi bo'lib o'tadi. Taqvim jamoamiz uchun qanday keladi? Avvalo shuni bilish kerak. Keyingina xorijga chiqish masalasini ham o'ylab ko'ramiz. 

- Sir emaski, har yili qishda jamoalar tarkibida o'yinchilarning keldi-ketdisi yuz beradi. “Metallurg”dan bu tomondan bizga eng aniq malumotni sizdan boshqa hech kim aniq ayta olmaydi. SHu bois bu xususda o'zingizdan eshitsak degandik?

- Mavsum yakunlangach futbolchilarga dam berganmiz. Hozircha hech bir o'yinchi menga klubdan ketish to'g'risida aytmadi. Agar shundaylar topilsa bunga qarshilik qilmaymiz. CHunki majburlab o'ynatishdan foyda yo'q. 

- U xolda aytingchi, mavsum davomida ko'z ostingizga olib qo'ygan o'yinchilar bormi?

- Tarkibimizni kuchaytirishga qodir bo'lgan yigitlarni taklif etishni rejaga kiritganmiz. Ishga esa endi kirishamiz. Yangi futbolchilar bilan muzokara o'tkazamiz. Kelisha olsak, safimizga qo'shib olamiz. Lekin bu bilan tarkibni butunlay o'zgartirib yuboramiz demoqchi emasman. Har yilgidek 1ta 2 nafar yangi o'yinchi bo'lishi mumkin. 

Islombek Rustambekov.