Rustam Mirsodiqov: "Qizilqum"ga qarshi o'yin qiyin kechishini bilardik"

Rustam Mirsodiqov, “Metallurg” FK bosh murabbiyi:- Birinchi davra oxirlashib borgan sari jamoalar barcha imkoniyatlarini ishga solib, kerakli ochkolarni jamg'arishga harakat qilishmoqda. “Qizilqum”ga qarshi o'yin qiyin kechishini bilardik.

SHunga yarasha o'yinga puxta tayyorgarlik ko'rdik. Raqibning o'yinlarini o'rgandik. Kerakli xulosalarga ega bo'ldik. O'z navbatida bu oy “Metallurg” uchun judayam omadli o'tayotganligini ham aytib o'tish lozim. So'nggi to'rtta uchrashuvdagi ketma ket g'alaba shogirdlarimning kayfiyatini ko'tarib yubordi. Turnir jadvalida yonma yon o'rinlarda borayotgan raqib bilan principial o'yinda ham g'alabaga bo'lgan ishtiyoqimiz ustun keldi.

Hisobda ortda qolayotgan bo'lishimizga qaramasdan tushkunlikka tushmadik. Aksincha yanada katta g'ayrat bilan oldinga tashlandik. Ko'rdinglar, biri biridan chiroyli kombinaciyalarimiz o'z mahsulini berdi. Butun o'yin davomida futbolchilarga ruhiy dalda bo'lib turgan ishqibozlarimizga rahmat. Nasib bo'lsa, yana bitta o'yin qoldi bu davrada. Uni ham muvaffaqiyatli o'tkazib olish niyatidamiz. Futbolchilarimdan hech birini ajratib ko'rsatmoqchi emasman. Bugun hamma o'yinchilar g'alaba yo'lida yaxlit, bir yoqadan bosh chiqarib harakat qilishdi.