"Raqib murabbiyi bilib qolmasligi uchun ularni mag'lub etishning kalitini aytmayman"

Germaniyada PSJ jamoasi "SHtutgart" mehmoni bo'ladi. Ana shu o'yin oldidan parijliklar ustozi Luis Enrike fikrlarini bildirib o'tdi.

"Men klassik "o'nlik" bilan o'ynamayman. 10-raqamdagi har qanday o'yinchi mening tizimimda qiynalardi. Biz bo'sh joylarni boshqacha egallaymiz.

Bizda 3 xil poziciyada 7 nafar hujumkor o'yinchi bor. SHuning uchun men ularning qanday hujum qilishlariga, qanday himoyalanishlariga qarayman. Biz ko'p qirralilik va o'yinchilar jamoani qanday kuchaytirishi mumkinligini qidiramiz.

Men futbolchilarimdan mamnunman, ularning barchasi bizga kerak. Ammo "to'qqizlik", "o'nlik" yoki "o'n birinchi raqam" tushunchalari - men bunga aslida qabul qilingani kabi qaramayman.

"SHtutgart"ning o'yinlarini tahlil qilib, ular o'tgan mavsumni ikkinchi o'rinda yakunlashganidan ajablanmadim. Ularda yuqori saviyali o'yinchilar bor.

Bu yaxshi hujum qiladigan va yaxshi himoyalanadigan jamoa. Ular sifatli bosim o'tkazishadi va ularga qarshi o'ynash qiyin. Ular to'rtinchi savatchada, ammo ularning saviyasi ushbu toifadagi aksar jamoalardan yuqoriroq.

Bu o'yin qiyin bo'ladi, boz ustiga biz ularning maydonida to'p tepamiz. Muvaffaqiyat kaliti? "SHtutgart" ustozi Sebastyan Xyoness bilib qolmasligi uchun bu haqda o'yindan oldin hech narsa demayman. Sizlarga ushbu bellashuvning nozik tomonlarini aytib bermoqchi emasman", - dedi PSJ bosh murabbiyi.