Qozog'iston futzal termasi ustozi Kaka: "Bizda legionerlardan Igita bilan Edson qoldi"

Uchrashuvdan so'ng Qozog'iston futzal terma jamoasi bosh murabbiyi Kaka fikrlarini bildirdi.

"Birinchi navbatda, O'zbekiston futzal terma jamoasiga bunday mehmondorchilik uchun rahmat aytaman. Biz mana shunday nooodatiy, chiroyli arenada to'p tepishga muvaffaq bo'ldik, chunki yuqori qismi ochiladigan arenada o'ynash ko'pchilikning orzusi. O'yin haqida to'xtalsam, ha, biz yutqazdik, lekin biz boshimizni tik tutishimiz kerak. Hayot oldinda. Bu biz uchun dars bo'ldi, ko'plab yoshlar harakat qildi. Yangi avlod bunday o'yinlar orqali o'sishga erishadi", – deydi Kaka. 

- Tarkibga etibor berar ekanmiz, 1 nafar braziliyalik futzalchi borligiga guvoh bo'ldik. Qozog'istonda Jahon chempionatida ko'plab braziyaliklar bor edi. Yangi tuzilayotgan jamoada ularning soni kamroq bo'lishi qaror qilinganmi?

- Duglas va boshqalar terma jamoamiz bilan xayrlashdi. Bizda Igita bilan Edson qoldi. Umid qilamanki, ular bizga yordam berishadi. Yoshlar o'zidan o'zi o'smaydi. Bu natija yoqimsiz, ammo biz bu bosqichdan o'tishimiz kerak. Yangi uy uchun albatta poydevor zarur. Gap natijada emas, o'yinda. Futzalchilar katta tajriba to'playotgani xursand qilmoqda.

- O'zbekiston chempionatida braziliyalik futzalchilar ko'pchilikni tashkil qiladi. Mutaxassis sifatida nima deya olasiz, legionerlar mahalliy futbolchilarga yordam bera oladimi?

- Albatta. Qozog'istonda joriy yil legionerlar kamroq va mazkur holat o'yin darajasiga o'z tasirini ko'rsatmoqda. Boshqa tomondan bu yoshlarga imkoniyat. Faqat balansni topa olish darkor. 

- O'zbekiston futzali tarixidagi eng yaxshi o'yinchini ayta olasizmi?

- Juda qiyin. Lekin oxirgi yillarda ko'rganimdan kelib chiqib aytsak, Husniddin Nishonov. U zamonaviy futzalchi, yaxshi zarbalar beradi, ko'p gollar uradi. Ha, butun tarixdagi eng yaxshisi deya olmayman, chunki o'zbek futzali tarixi bilan to'liq tanish emasman.