"Qo'qon-1912": Mashg'ulotlar davom etmoqda (Foto)

Mashg'ulotlar kuniga ikki mahaldan o'tkazilmoqda. Futbolchilarimiz kunning birinchi yarimida trenajyor zalida,  ikkinchi yarimida esa “Markaziy”  stadionida mashg'ulotlar olib borishmoqda.

Mashg'ulotlarda O'zbekiston (U-23) yoshlar terma jamoasi ixtiyorida bo'lib turgan Javohir Sidiqov, Oybek Rustamov, Avaz Mamatxo'jaev hamda Andre Sidorovlar ishtirok etishmayapti. SHuningdek, Nikita Ribkin jamoamiz bilan shartnomasi yakuniga etganligi bois yig'inga jalb qilinmagan. Jamoamiz rahbariyati hamda ko'psonli muxlislarimiz nomidan Nikita Ribkinga jamoamizdagi o'yinlari uchun minnatdorchilik bildiramiz hamda uning keyingi faoliyatida omad tilaymiz.

O'tgan mavsumni Jizzaxning “So'g'diyona” jamoasida yakunlagan qo'qonlik darvozabon Muzaffar Abdullaev, “Neftchi” jamoasidan taklif qilingan posbon O'tkir Yusupov, shuningdek, o'tgan mavsumning ikkinchi yarimini  “Andijon”  jamoasida o'tkazgan Sobir Xamidovlar jamoamiz mashg'ulotlariga qo'shilgan.

Bosh murabbiyimiz No'mon Hasanov yoshlar tarkibimizda o'zini ko'rsatgan bir qator yosh futbolchilarimizni ham asosiy tarkib mashg'ulotlariga jalb etgan. O'rinbosarlarimizning o'tgan mavsumni 3-o'rinda yakunlashiga o'zining munosib hissalarini qo'shgan Islom Abdullaev, Iqbol Malikjonov, Doston Meliqo'ziev, Dilshod Baratov, Abror Rahmonov, Ibrohim Ahmadjonov, Ismoil Oxunjonov kabi bir qator yosh futbolchilarimiz bosh murabbiyimizning ishonchini oqlash uchun mashg'ulotlarda astoydil ter to'kishmoqda.

Quyida mashg'ulotlardan olingan suratlar bilan tanishing: