Qarshidagi durang aldamchimi yoxud "Bunyodkor" - "Nasaf" o'yini oldidan so'nggi so'z championat.asia sayti xodimlariga

Garchi "Bunyodkor" jamoasi ayni paytda turnir jadvalida quyidan o'rin olgan bo'lsada, bu o'yinga markaziy maqomni berishimizga to'sqinlik qila olmaydi. Buning yagona sababi esa jamoalarning teng kuchga ega ekanligi hamda o'yin uslubi jihatdan o'xshashligidir. SHunindek, ikki klub ham o'z akademiyalariga muntazam ravishda etibor qaratib kelishmoqda. Ayni paytda "Nasaf"ning ham, maydon egalari tarkibining asosini o'z tarbiyalanuvchilari tashkil qiladi. Qarshiliklarning so'nggi o'yinlarda natijalaridagi ustunlik ushbu uchrashuvga kelib o'z ahamiyatini yo'qotadi. Kubokdagi 1:1 hisobi ham aldamchi bo'lishi mumkin. Ikki jamoa ham bir-biriga qarshi qanday o'ynash kerakligini juda yaxshi biladi.

Etiborlisi, "Bunyodkor" Superligada uchta turdan buyon raqiblarini enga olmayapti. Jamoa "Andijon"ni mag'lub etganidan keyin "Qo'qon-1912" va "So'g'diyona" bilan durang o'ynadi, oxirgi turda "Lokomotiv"ga imkoniyat boy berildi. Mezbonlarda nohush seriyaga chek qo'yish imkoniyati mavjud. Lekin "qaldirg'ochlar" deyarli barcha o'yinlarda ilk daqiqalarni yomon o'tkazyapti. Agarda bugun ilk daqiqalarda xatoga yo'l qo'ymasa va darvozasi dahlsizligini saqlab qolsa ijobiy natijaga erisha oladi. "Bunyodkor" ikkinchi bo'limda ko'proq raqiblariga muammo tug'dira olyapti.

"Nasaf" dastlabki turda "Paxtakor"ga mag'lub bo'lganidan so'ng AGMK va "Navbahor" bilan durang o'ynadi, keyin "Turon", "Qizilqum" va "Surxon" taslim etildi. Ro'ziqul Berdiev shogirdlari mazkur uchrashuvdan so'ng OFK kubogiga tayyorgarlikka etibor qaratadi. Qaysidir manoda "ajdarlar"da bosim bor, deya olamiz. Lekin mehmonlarning ajoyib holatda va sport formasida ekanligi bugungi to'qnashuvda asqotishi ehtimoli katta.

 Demak, bizni oldinda qiziqarli va keskin bahs kutmoqda. Muxlislarni stadionga yo'naltirgan holda o'yin boshlanishiga oz fursatlar qolganida mikrafonni saytimiz xodimlariga tutamiz.

Narzulla Saydullaev (ortiqcha tarifga xojat yo'q. Saytimiz motori) - Bunyodkor" va "Nasaf" uchrashuvida mehmonlarni favorit deb o'ylayman. Uchrashuvda ko'p gol ko'ramiz deb umid qilaman. Yakunda menimcha "Nasaf" g'alaba qozonib ketadi. Sababi jamoa ayni paytda ajoyib sport formasida.

Faxriddin Ro'ziev (saytimizning eng aqlli va kamtar xodimi) - "Nasaf" murabbiy faktori tufayli 3:1 hisobida g'alaba qozonishini taxmin qilaman.

SHerzod Nurmatov (Futbol retro talqinda loyihasining 100-sonini chiqarish arafasida turgan xodimimiz) - Ikki jamoa ishtirokida chiroyli futbol ko'ramiz, deb o'ylayman. Jamoalarning oxirgi uchrashuvlardagi ko'rsatayotgan o'yinlaridan kelib chiqsak "Nasaf" poytaxtdan g'alaba bilan qaytadi. "Bunyodkor" o'z maydonida o'ynayotgani hisobiga bitta gol urishi mumkin. Taxminiy hisob 3:1, mehmonlar foydasiga.

Jahongir Fayzullaev ("Guliverning sayohatlari" kitobini hali hamon o'qiyotgan fotografimiz) - Qiziqarli va chiroyli o'yin bo'ladi. Hisob qanday bo'ladi, bilmayman. "Nasaf" g'alabasini taxmin qilaman.

Stadionda ko'rishguncha azizlar!