Prevyu. Janubiy Koreya - Qatar

“A” guruhida dastlabki bellashuv aynan mana shu jamoalar o'rtasida Suvonda o'tkaziladi. Avvalgi turda Suriyaga qarshi bahsda kutilmaganda ochko yo'qotgan koreyslar endi bunday xatoni takrorlamaslikka urinishlari turgan gap. Qolaversa, 5 kundan keyin Uli SHtilike jamoasini Eron bilan mehmonda kechadigan o'yin kutib turibdi. Koreyaning Evropada o'ynayotgan futbolchilari tobora yaxshi holatga kirib borishmoqda. Bu esa mezbonlarga qo'l kelishi tabiiy.

Qatar yaqindagina murabbiyini almashtirdi. Xorse Fossati hamyurti Xose Karreno o'rnini egalladi. Qatarliklar oldingi bahslarda so'nggi daqiqalarda o'tkazib yuborilgan to'plar oqibatida mag'lubiyatga uchrashgandi. Fossatining qanday o'zgarishlar qilganini Koreyadagi uchrashuv ko'rsatadi. Bellashuvdan oldin koreyslarning imkoniyatini ancha yuqori baholay olamiz. CHunki bu jamoa o'z maydonida deyarli xatolarga yo'l qo'ymaydi. Qatar ketma-ket uchinchi mag'lubiyatni tan olgan taqdirda guruhdagi ahvolini ancha yomonlashtirib qo'yadi. Son Xyon Minni zararsizlantirishni uddalay olishsa, mehmonlar ijobiy natijaga umid qilishlari mumkin. Aks holda, Doxaga quruq qo'l bilan qaytishlariga to'g'ri keladi.

Jamoa yulduzlari: Son Xen Min - Sebastyan Kuintana

JANUBIY KOREYA – QATAR
6 oktyabr 2016. Suvon. "World Cup 2002" stadioni. 16:00
Bosh hakam: Mohd Amirul Izvan Yoqub (Malayziya)