Pedru Moreyra: "Natija bunday bo'lishi kerak emas edi. Men jamoaga masuliyat olganman"

"Uchrashuv kutilganidek og'ir o'tdi. Raqibga hujumlar orqali muammolar yaratishga urindik. Birinchi bo'limda yaxshi o'ynadik, ammo dastlabki golni o'tkazib yuborganimizdan so'ng o'yinimizda o'zgartirishlar qilishga harakat qildik. Standart holatidan gol o'tkazib yubordik. Futbolchilar bor imkoniyatlarini ishga solishdi. Menimcha, natija bunday bo'lishi kerak emas edi", - dedi portugaliyalik mutaxassis bahs yakunlanganidan so'ng.

- G'alaba uchun hujum, golli vaziyatlar va raqib jarima maydoni yaqinidagi harakatlar kerak. "Paxtakor" o'tgan turda ham, bugun ham hujumlar yaratishda qiyinchiliklarga duch keldi. Buni qanday izohlaysiz?

- Raqiblar aynan bizga qarshi himoyaviy o'yin namoyish etishadi. Raqiblar o'z darvozasi oldida zich himoyalanib olishadi. Bugun ham vaziyatlar yaratdik, ayniqsa birinchi bo'limda 2-3ta imkoniyatlarga ega bo'ldik. To'p darvozaga kirib ketayotgan paytda raqib himoyachisi to'pni uzoqlashtirib yubordi. Gol o'tkazib yuborganimizdan so'ng tavakkalga qo'l urishga majbur bo'ldik. Aytib o'tganimdek, raqib standart vaziyatlarda yaxshi ishladi va o'z imkoniyatlarini golga aylantira oldi. 

- “Paxtakor" o'z maydonida "Andijon"ga yutqazmagan edi. Bugungi o'yin natijasi tarixiy bo'ldi. Siz raqibni o'yin avvalida qanchalik o'rganib chiqqandingiz?

- Albatta, har bir raqibni o'yinoldi tayyorgarlik jarayonida o'rganib chiqamiz. Biz bugun raqib jarima maydonchasi ichida va atrofida raqibga muammolar tug'dira oldik. To'p nazorati ham biz tomonda bo'ldi. Golli vaziyatlarimiz ham bo'ldi. Tarkibimizda mahoratli ijrochilar bor. Bugungi o'yin natijasi bunday tugamasligi lozim edi.

- "Paxtakor" avvallari raqiblarni o'z o'yiniga moslashtira olardi. Bugungi o'yinda jamoa "Andijon"ga moslashib o'ynagandek ko'rindi ...

- Biz ushbu masalalar ustida ishlaganmiz. Masalan, qanday to'g'ri hujum qilish va qanday qilib himoyalanish. Bizda ko'plab vaziyatlar bo'ldi va hujumlar tashkil etdik. "Andijon" bugun vaziyatlardan foydalanib ketdi.

- O'yindan oldin raqib bosh murabbiyiga qandaydir sovg'a berdingiz. U nima edi?

- Mening vatanimda shunday odat bor. Mehmon jamoalarni iliq kutib olish va ularga qandaydir sovg'a ulashish. Asosan shirinliklar, yong'oq va shunga o'xshash emaklar sovg'a sifatida beriladi...

- Hozirgina "Paxtakor"ga qarshi barcha jamoalar himoyaviy uslub qo'llashadi dedingiz. Menimcha, bu tabiiy holat. Sababi "Paxtakor" eng kuchli jamoalardan biri va futbolimizdagi eng katta nom. Barcha jamoalar barcha davrlarda "Paxtakor"ga qarshi himoyaviy uslub tanlashgan, lekin shunga qaramay "Paxtakor" bunday raqiblarni mag'lub etib kelgan. Masalan, o'tgan mavsumda jamoa "Andijon"ni ikki marotaba mag'lub etgandi. 10 yil avval ham "Andijon" "Paxtakor"ga qarshi himoyalanib o'ynagan. "Andijon" bugun ham shunday qildi, ammo g'alaba qozonib ketdi. Ushbu mag'lubiyatlarga nima sabab bo'lmoqda? Oldin "Paxtakor" raqib himoyaga tayanganiga qaramay g'alaba qozongan, sizning jamoangiz esa mag'lub bo'lmoqda...

- Birinchi navbatda har bir raqib bizning harakatlarimizni kutadi va qarshi hujumga umid qiladi. Jamoa bir hafta davomida tayyorgarlik ko'rdi va mehnat qildi. Tarkibda yo'qotishlar bor. Jarohatlangan futbolchilarimiz tezroq tarkibga qaytishsa, yanada kuchayishimiz aniq. Shogirdlarim bugun yaxshi harakat qilishdi, to'pni nazorat qilishdi, ammo raqib o'zining ikkita imkoniyatidan foydalanib ketdi.

- Muxlislar o'yindan so'ng sizga qarata bir nima deyishdi. Muxlislar nima deya baqirganini o'zingiz eshitdingiz. Ularning gaplariga qanday javob qaytara olasiz?

- Birinchi navbatda, men jamoaga masuliyat olganman. Har bir holatda mening shanim va yuzim javobgar bo'ladi. O'tgan uchrashuvda bizni juda ko'p muxlislar qo'llab-quvvatlashdi, bugun ham shundan bo'ldi. Muxlislarimizdan shunday davom etishlarini so'ragan bo'lar edim. Men o'yinimizni yanada yaxshilashga intilishim kerak. Jamoani kuchaytira olish yo'llarini qidirishim kerak.