“Paxtakor-79” xotirasiga bag'ishlangan sher

“Paxtakor-79” xotirasiga

Qushlar uchar saflashib,

Toshkentning osmonida.

Faryodlar eshitilar

“Paxtakor” maydonida.

Qushlar ham qaytar bir kun, 

Saflarini buzmasdan.

Ko'kka termulaman men

Umidimni uzmasdan.

Dili og'rimasin deb,

Hech kim rostin aytmaydi.

“Paxtakor” samolyoti

Endi ortga qaytmaydi.

Ko'z o'ngimda har biri

Tirik jonga o'xshaydi.

Yulduz futbolchi asli

Samolarda yashaydi.

Erta ketdi o'g'lonlar,

SHijoati o'lmasdan.

Biri yosh kuyov, biri

CHimildiq ham ko'rmasdan.

Birining murg'ak o'g'li

Yurmas endi qiqirlab.

Termuladi olisga

Burunchasi piqirlab.

Endi diydorlashishning 

Bo'lmaydi hech fursati.

Qo'lida otasining

Kulib turgan surati.

Otasining jamoasin

Eslab qolgan u zukko.

So'lakchasin oqizib,

SHivirlaydi: “Pa-ta-ko...”

Tilga kiradi surat:

“Yig'lamagin, jujuqcha.

Qaerda bo'lmagin, men

Hamisha yoningdaman.

Otangning ruhin shod qil,

Ko'rsat matonatingni.

Boshingni baland ko'tar,

G'oz tutgin qomatingni!..”

Mushtipari dod solar,

Bag'rida ho'l yostig'i:

“Sening o'rningga, mana,

Men o'lsam bo'lmasmidi...”

Uchayotgan qushlarga

Pichirlar ona g'amgin:

“Kulikovo dashtiga

Nolalarim etkazgin...”

SHikastlangan Isoqov

Ko'kka parishon boqar.

Ko'zlariga qo'shilib,

Oyog'idan yosh oqar.

Der: “Oyoq-ku, tuzalar,

Ammo etishmas havo.

Qalbda qolgan chandiqqa 

Topib bo'lmaydi davo...”

Qushlar uchar saflashib,

Toshkentning osmonida.

Hayqiriqlar eshitilar

“Paxtakor” maydonida.

Qushlar ham qaytar bir kun, 

Saflarini buzmasdan.

Ko'kka termulaman men

Umidimni uzmasdan.

Dili og'rimasin deb,

Hech kim rostin aytmaydi.

“Paxtakor” samolyoti

Endi ortga qaytmaydi.

Bugun ulg'aygan o'g'il, 

Sochlariga yoqqan qor.

Farzandiga otasin

Eslatar takror-takror.

Bobosining jamoasin 

Yod olgan jajji zukko.

So'lakchasin oqizib,

SHivirlaydi: “Pa-ta-ko...”

Ular qoldirgan yo'ldan

Avlodlar davom etar.

Mamlakatning yoshlari 

Dunyoni zir titratar.

Ular bizni tark etmas, 

Qalbimizda siyrati.

Yulduzlarda aks etar

Kulib turgan surati.

Tilga kirar yulduzlar:

“Taslim bo'lma hech qachon.

Qaerda bo'lmagin, men

Hamisha yoningdaman.

Ajdodiing ruhin shod qil,

Ko'rsat matonatingni.

Boshingni baland ko'tar,

G'oz tutgin qomatingni!”

Oqil Abdubarnoev