O'zbekiston Kubogi. Finallar tarixidan

O'zingizga malum, 30 noyabr chorshanba kuni Samarqand shahridagi “Dinamo” stadionida O'zbekiston Kubogi-2016ning final uchrashuvi bo'lib o'tadi. Unda “Nasaf” jamoasi “Bunyodkor”/”Lokomotiv”  jamoalari juftligining g'olibi bilan kuch sinashadi.

Bu yil o'zbek futboli tarixidagi XXIV O'zbekiston Kubogi final uchrashuvi bo'lib o'tadi. O'zbekiston Kubogi musobaqasi 1992 yildan boshlab o'tkazila boshlangan. Ilk finalchi “Navbahor” va “Temiryo'lchi” jamoalari bo'lishgan. Mazkur o'yin Samarqand shahrida o'tkazilgan. Namanganning “Navbahor” jamoasi O'zbekiston Kubogining ilk sohibi hisoblanadi. Oradan 23 yil o'tib, Samarqand shahri yana final uchrashuviga mezbonlik qilmoqda.

O'zbekiston Kubogining amaldagi egasi Qarshining “Nasaf” jamoasi hisoblanadi.

O'zbekiston Kubogi finaliga oid faktlar

SHu paytgacha O'zbekiston Kubogini mamlakatimizning etti jamoasi qo'lga kiritgan.

“Paxtakor” – 11 marta (1993, 1997, 2001/02, 2002/03, 2003, 2004, 2005, 2006, 2007, 2009, 2011 yillar)

“Bunyodkor” – 4 marta (2008, 2010, 2012, 2013 yillar)

“Navbahor” – 3 marta (1992, 1995, 1998 yillar )

“Neftchi” – 2 marta (1994, 1996 yillar)

“Do'stlik” – 1 marta (1999/00  yil)

“Lokomotiv” – 1 marta (2014 yil)

“Nasaf” – 1 marta (2015 yil)

Eng ko'p finalga mezbon bo'lgan stadion: “Paxtakor”  markaziy stadioni – 18 marta. 2014 yildan buyon finallar boshqa stadionlarda o'tkazilmoqda.

Eng ko'p tomoshabin kirgan final: “Do'stlik” – “Samarqand” (30000 tomoshabin) 1999/2000 yillar

Eng ko'p gol urilgan o'yin: “Paxtakor” – “Neftchi” 6:3 (qo'shimcha vaqtda) 2001/2002 yillar

Eng kam gol urilgan uchrashuvlar: “Navbahor” – MHSK (1:0), “Paxtakor” – “Neftchi” (1:0), “Paxtakor” – “Bunyodkor” (1:0), “Bunyodkor” – “SHo'rtan” (1:0), “Lokomotiv” – “Bunyodkor” (1:0).

Kubok finallarida 3 marta penaltilar seriyasiga, 4 bor qo'shimcha vaqtlarga murojaat qilingan. Finallarda jami 62 marta to'p darvozalarga kiritilgan (penaltilar seriasidan tashqari). Final uchrashuvlariga jami 287 048 tomoshabin tashrif buyurgan.

O'zbekiston Kubogi finallari tarixidagi eng so'nggi gol muallifi – SHerzod Azamov hisoblanadi (“Nasaf”).

O'zbekiston Kubogi finallarini eng ko'p boshqargan hakam

O'zbekiston Kubogi final uchrashuvlarini eng ko'p boshqargan hakam Ravshan Ermatov hisoblanadi. Ravshan Ermatov shu paytgacha 2010, 2011, 2012, 2013, 2015 yillardagi final uchrashuvlarini boshqargan. Ravshan Ermatovgacha finallarda ko'p ishlagan hakamlar ikkita bo'lgan, Gali imomov (4 marta) va Noil Lutfullin (4 marta)

Berdiev uchun murabbiy sifatida to'rtinchi final

“Nasaf” klubi uchun navbatdagi final o'z tarixidagi oltinchisi bo'ladi. Ro'ziqul Berdiev esa bosh murabbiy sifatida o'z jamoasini finalda to'rtinchi marta (2012, 2013, 2015, 2016 yillar) maydonga olib tushadi. 2003 yilda bo'lib o'tgan “Nasaf” ishtirokidagi finalda Ro'ziqul Berdiev jamoaning sardori sifatida maydonda harakat qilgan. 2011 yildagi finalda esa, yordamchi murabbiy bo'lgan.