O'zbek futboli. Hakamlar bilan bog'liq vaziyatlar tufayli reglamentga o'zgarishlar kiritildi

Aksariyat vaziyatlarda bunday etirozlar asosan futbol klublarida faoliyat olib borayotgan murabbiylar tomonidan bildirilmoqda. SHundan kelib chiqib doimiy ravishda futbol klublarining hakamlarga bo'lgan noroziligini musobaqalar reglamentida o'rnatilgan tartibda amalga oshirishlarini taminlash va nazorat qilish masalasi bo'yicha 2021 yilgi musobaqalar reglamentining 18-bobiga quyidagi tahrirda qo'shimcha bandlar kiritildi:

"18.19. Musobaqa davomida yoki uning yakunida bosh murabbiy, klub rahbari yoki futbolchisi uchrashuv hakamligiga nisbatan o'z etirozini bildirsa, biroq uchrashuv rasmiy qaydnomasiga Reglamentning 16.2-bandida ko'rsatilgani bo'yicha shikoyat arizasi kiritmasa, O'FAning "Intizom kodeksi"ga muvofiq jarima sankciyasi qo'llaniladi".

Bu nima degani? Bir qaraganda barchasi tushunarli. Lekin endilikda har bir futbol klubi murabbiyi, klub rahbari yoki futbolchisi hakamlar bilan bog'liq vaziyatlarda o'ta hushyor bo'lishi talab etiladi. Yani yuqorida aytib o'tilgan shaxslar o'yin davomida uchrashuv hakamiga nisbatan etiroz bildirsa va keyinchalik o'yinning borishidan kelib chiqib bu xolat o'zining ham yodidan ko'tarilib ketmasligi kerak. O'sha etirozlar tegishli tartibda o'yin yakunidan so'ng uchrashuvning rasmiy qaydnomasiga ham kiritib qo'yilishi talab etilmoqda. Bundan tashqari murabbiy tomonidan matbuot anjumanlarida uchrashuv hakamlari bilan bog'liq vaziyatlar tufayli o'z etirozlarini bildirib o'tsalar, albatta uning bu etirozlari rasmiy qaydnomada ham aks etgan bo'lishi shart. Aks xolda O'FAning "Intizom kodeksi"ga ko'ra futbol klublari va etiroz bildirgan shaxslarga nisbatan belgilangan tartibda jarima chorasi qo'llaniladi.

"18.20. Musobaqa davomida jamoa uchun belgilab qo'yilgan texnik zonada faqatgina bosh murabbiyning erkin harakatlanishi hamda maydondagi futbolchilarga ko'rsatma berishi uchun ruxsat etiladi. Qolgan barcha vaziyatlarda klubning boshqa vakiliga nisbatan O'FAning "Intizom kodeksi"ga muvofiq jarima sankciyasi qo'llaniladi".

Bunda endilikda futbol uchrashuvlari vaqtida futbolchilarga ko'rsatmalar berish uchun texnik zonada erkin harakatlanishga faqatgina bosh murabbiy haqli ekanligi qatiy belgilab qo'yildi. Masalan "Navbahor"da bosh murabbiy Viktor Jalilov bilan birgalikda maslahatchi murabbiy Samvel Babayan ham futbolchilarga ko'rsatma berish uchun texnik zonada erkin harakatlanmasligi shart.

Umid qilamiz-ki, yuqorida keltirilgan o'zgarishlar futbolimiz rivoji hamda imidjining yuqorilashiga xizmat qiladi.

Bekzod Tolibov tayyorladi