Otabek SHukurov: “Xalqimizning ishonchini oqlashimiz lozim”

“Birinchi marta 17 yoshlilar o'rtasidagi mundialda qatnashganimdan keyin jahon chempionatining qanday nufuzli musobaqa ekanini his qilganman”, deydi SHukurov. “O'shanda Gonduras terma jamoasiga mag'lub bo'lganimiz menga qattiq alam qilgan. O'tgan yili Osiyo CHempionatida muvaffaqiyatli qatnashib, mundial yo'llanmasini qo'lga kiritganimizdan beri butun etiborimni Yangi Zelandiyada bo'lib o'tadigan turnirga qaratganman. Tayyorgarlik jarayoniga jiddiy etibor beryapmiz. Oldimizda turgan Jahon CHempionatida avval erisha olmagan natijalarimizga erishishimizni istayman”.

“Ko'pchilik guruhimizda Germaniya favorit ekanini aytmoqda. Albatta, ular kuchli va chindan ham favorit. Ammo bunday musobaqada har qanday o'yin ham og'ir o'tadi. Jahon chempionatiga hamma boshqacha tayyorgarlik bilan keladi. Tailandda o'tgan musobaqada Gonduras olimpiya terma jamoamizni mag'lub etgandi. Fiji ham oddiy raqib emas. Yig'inlar davomida barcha jamoalarning o'yinlarini ko'rib, o'rganib boryapmiz. Hamma narsa o'z qo'limizda. O'ylagan maqsadimizga erishish uchun barcha imkoniyatlarimiz bor. Xalqimiz ishonchini oqlashimiz lozim”, deya Otabek raqiblar va Jahon CHempionatiga tayyorgarlik borasidagi fikrlarini bildirdi.

Eslatib o'tamiz, yoshlar o'rtasidagi Jahon CHempionati Yangi Zelandiyada, 30 may kuni start oladi.