Otabek Haydarov: “Bu yil 15ta gol uraman deb aytgandim”

Etiborlisi 24 yoshli futbolchi Qo'qonda kechgan “Navbahor”ga qarshi bahsda ham zaxiradan tushib gol urgandi. “Mashal” bilan o'yindan so'ng Haydarovni suhbatga chorladik.

- Otabek, avvalo qo'lga kiritilgan g'alaba bilan tabriklaymiz. O'yin haqida taassurotlaringiz qanday?
- Tabrik uchun rahmat. O'yin qiziqarli va shiddatga boy tarzda o'tdi. Raqib jamoa ham kuchli edi. Murabbiylarimiz “Mashal”ni bungacha bo'lgan o'yinlarini bizga video diskini qo'yib, kerakli ko'rsatmalarni bergandi. Mashg'ulotlarda ham astoydil ishladik. Natija ham shunga yarasha bo'ldi. G'alaba qozonganimizdan xursandman. Nasib qilsa keyingi turlarda ham kerakli ochkolarni qo'lga kiritamiz.

- Zaxiradan tushayotganingizda gol urshingizga qanchalik ishongandingiz?
- Ichki xis-tuyg'u o'zimga bo'lgan ishonchni oshirgandi va gol urishimni sezgandim. Xudoga shukur bitta imkoniyatdan unumli foydalandim va niyatimga etdim. Albatta urgan golim bilan jamoamga uch ochko keltirganimdan mamnunman. Bu bilan to'xtab qolmasdan, kelgusi o'yinlarda ham gollarim sonini oshirib borishga intilaman.

- “Mashal”ning o'yin haqida qanday fikrdasiz?
- Muborakliklar yaxshi o'yin ko'rsatishdi. Ayniqsa ular ikkinchi bo'limda 10 kishi bo'lib qolganida o'yinni yanada kuchaytirdi. Tan olish kerak, raqib jiddiy qarshilik ko'rsatdi. SHunday bo'lishini oldindan bilgandik.

- “Lokomotiv” bilan o'yinda jamoangiz foydasiga penalti ishladingiz. “Navbahor” va “Mashal”ga qarshi bahslarda esa zaxiradan maydonga tushib muhim gollarni kiritdingiz. Bu kabi o'yinchilarni odatda sexrli tayoqcha deyishadi...
- ... Bilmasam. Men o'z vazifamni bajaryapman. Munosib bahoni muxlislar va mutaxassislar bergani maqul.

- Garchi shunday bo'lsada, murabbiy hozircha sizni asosan zaxiradan maydonga tushirmoqda. Bunga qanday munosabatdasiz?
- Tarkibda mendan tashqari boshqa yana tajribali hujumchilar bor. Bosh murabbiy ko'proq boshlang'ich tarkibda maxorati yuqori bo'lganlarni tushurishni afzal bilmoqda. Men esa o'tgan yili birinchi ligada o'ynaganman. Elitada endi-endi o'ynay boshladim. Balki shuning uchun ham zaxiradan tushayotgan bo'lsam kerak. Har qanday xolatda ham murabbiyning qarorini hurmat qilaman.

- O'tgan yili “Qo'qon-1912” tarkibida o'ynab to'purarlik mahoratingizni namoyish etgandingiz. Sir bo'lmasa bu yil o'z oldingizga nechta gol urishni maqsad qilib qo'ygansiz?
- Yil boshida klubga kelganimda murabbiylar mendan nechta gol urishimni so'rashgandi. SHunda ularga bu yil 15ta gol uraman deb aytganman. Bu shashtimdan qaytmadim va mavsum davomida amalda shunday bo'lishi uchun astoydil xarakat qilaman.

- SHu kungacha bo'lgan qaysi o'yin jamoangiz uchun qiyin kechdi?
- Oliy ligada oson o'yinlarning o'zi yo'qligini tushunib etdim. Har bir bahsda o'ziga yarasha jang bo'ladi. SHaxsan men safarda “Lokomotiv”ga qarshi kechgan o'yinda qiynaldim. CHunki markaziy yarim himoya mening joyim emasdi. Lekin murabbiyning talabiga binoan o'ynashga majbur bo'ldim.

- Bu yil jamoangizni o'zgartirdingiz. Yangi muhitga moslashib ketish siz uchun aftidan qiyin bo'lmayotgandek. SHundaymi?
- Ha, “Neftchi” men uchun begona emas. Jamoadagilar bilan avvaldan tanish edim. Ayniqsa Baxtiyor Yoqubov, Mansur Saidov va SHukurali Po'latov bilan munosabatlarimiz juda yaxshi. Ular ham moslashib ketishim uchun o'z yordamlarini ayamadi.

- “Neftchi” bugungi kunda turnir jadvalining 3-pog'onasidan o'rin egallab turibdi. Lekin mavsum so'nggiga qadar uni saqlab qolish oson bo'lmaydi. Fikrimizga qo'shilasizmi?
- Ha. Mavsum avvalida futbolchilar va murabbiylar bu yil yuqori o'rinlarni egallashni va shu tariqa “Neftchi”ning avvalgi qaddini tiklashni maqsad qilganmiz. Buni ayni damdagi tarkib bilan uddalasa bo'ladi. Nasib qilsa kelasi yil OCHLda o'ynash huquqini beruvchi yo'llanmani qo'lga kiritamiz.


Islombek Rustambekov suhbatlashdi.