Osiyo Kubogi. Suriya - Falastin. O'yindan oldingi matbuot anjumani

SHarja shahridagi "SHarja Stedium"da Suriya va Falastin terma jamoalari o'zaro bahs olib boradi. O'yindan oldin tashkil qilingan matbuot anjumanida har ikki jamoa bosh murabbiylari ishtirok etishdi.

"Mashg'ulotlarga o'zgacha kayfiyatda yondoshdik, musobaqaga alo darajada tayyorgarlik ko'rdik. Suriyaga qarshi o'yinimiz bilan nafaqat Osiyo, balki jahon etiborini o'zimizga qaratishni xohlaymiz", - deydi Falastin bosh murabbiyi Nuriddin Ould Ali.

Hozirda bu jamoani jazoirlik murabbiy boshqarmoqda. 46 yoshli murabbiyning aytishicha, guruh favoritlari Avstraliya bilan Suriya. "Ha, biz dastlabki uchrashuvni favoritlardan biriga qarshi o'tkazamiz. Lekin bundan sarosimaga tushayotganimiz yo'q. Musobaqaga tayyorgarlikni Qatarda olib bordik va hammasi yaxshi kechdi. Suriya termasida kuchli futbolchilar ko'p, biroq biz ham qarab turmaymiz va jamoa sifatida natija ko'rsatishga harakat qilamiz".

Suriya terma jamoasi bosh murabbiyi Bernd SHtangening fikrlari quyidagicha bo'ldi:

"Biz juda yaxshi tayyorgarlik ko'rdik. Safimizda bitta jarohat olgan futbolchi bor: Firas Al Xatib. Qolgan o'yinchilar soppa-sog' va o'yinga tayyor. Jamoamizdan hali hech kim biz bu erga chempion bo'lish uchun keldik degani yo'q. CHunki musobaqada yaxshi jamoalar ko'p va hamma bilan o'yin og'ir kechadi. Qolaversa, bu musobaqada jahon chempionatida qatnashgan jamoalar bor. Ko'proq shulardan ehtiyot bo'lish kerak".

"2007 yilgi Osiyo Kubogida Iroq terma jamoasi chempionlikni qo'lga kiritib, futbolda hamma narsaning iloji borligini ko'rsatib bergandi. Balki bu musobaqa Suriyaga atalgan bo'lishi mumkin. Futbolda oldindan katta gapirmaslik kerak, lekin maqsad sari sekin-asta harakat qilish lozim deb o'ylayman".