Osiyo Kubogi-2015. Quvayt murabbiyi: "Biz Avstraliyaga qarshi tayyormiz"

Bugun ikkala jamoa bosh murabbiylari ishtirokida ananaviy matbuot anjumani bo'lib o'tdi. Bunda Quvayt termasi bosh murabbiyi Nabil Malul quyidagi fikrlarni bildirdi:

- Men jamoani atigi uch hafta oldin qabul qilib oldim, shunga qaramay, shogirdlarimning hammasini bilaman. Albatta, bizda tayyorgarlik jarayoni nihoyatda kam bo'ldi, ammo shu qisqa vaqt ichida shogirdlarim bilan tezda til topishib keta oldim. O'ylaymanki, Avstraliyaga qarshi tayyormiz.

- Ko'rfaz kubogi bahslari biz uchun yaxshi o'tmadi, shu bois endi Osiyo chempionatida o'zimizni ko'rsatishga harakat qilamiz. Quvayt termasi to'rt yil oldingi musobaqada guruhdagi uchala o'yinni ham boy bergandi, lekin bu safar bunday bo'lmaydi deb umid qilaman. Dastlabki bahs oldidan futbolchilarimizda hayajon bor, lekin bu uzoq davom etmasligi kerak. Ayrim sabablarga ko'ra, Fahad Al Enazini tarkibga jalb qilmadik, endi uning o'rnida boshqalarni sinab ko'ramiz.