Oliver Kan: "Yulian bilan shartnoma imzolayotganda u bilan uzoq vaqt ishlaymiz deb o'ylagandik"

"2021 yilda Yulian bilan shartnoma imzolayotgan vaqtimizda u bilan uzoq vaqt ishlashimizga ishonchimiz komil edi va bu biz uchun asosiy maqsadga aylanayotgandi. Yulian muvaffaqiyatli va chiroyli futbol namoyish qilgani bilan diqqatimizni tortgandi. Biroq hozir biz shunday tushunchaga keldikki, o'tgan yilgi chempionlik va tarkibning sifatiga qaramasdan barchasi pastroq darajadadek.

Jahon chempionatidan keyin biz unchalik chiroyli bo'lmagan o'yin ko'rsatdik va muvaffaqiyat ham pastroq bo'ldi. Natijalardagi sezilarli pasayish nafaqat mavsumiy maqsadlarimizni, balki, undan keyin rejalarni ham so'roq ostiga qo'ydi. Aynan shu sababli reakciya qilishni lozim topdik. O'zim va klub nomidan Yulian va uning murabbiylar jamoasiga ularning kelgusi faoliyatiga omad tilaymiz", - dedi Kan.

Bunga o'z navbatida "Bavariya" sport direktori Xasan Salixamidjich ham o'z fikrlarini bildirdi: "Ushbu lavozimga kelganimdan buyon qabul qilingan eng qiyin qaror bo'ldi. Ilk kunlardanoq Yulian bilan ochiq, ishonchli va do'stona munosabatlarni o'rnatganman. Yulian bilan xayrlashish oson bo'lmadi. Ammo jamoaning yanvar oyidan keyingi o'yinlari va natijalarini chuqur taxlil qilib, Yulian bilan xayrlashish qarorini birgalikda chiqardik. Uning "Bavariya" uchun mehnatidan mamnunman va doimo eng yaxshi tilaklarni tilayman".