Oliy liga-2013 yakunlari. Murabbiylar haqida

Ushbu mavsumda oliy liga klublarida jami 20 ta murabbiy faoliyat olib bordi. 10 ta klubni mavsum davomida bitta murabbiy boshqarib bordi. Bu klublar: “Buxoro”, “Guliston”, “Navbahor”, “Nasaf”, “Paxtakor”, “Bunyodkor”, “Metallurg”, “Lokomotiv”, “So'g'diyona” va “Olmaliq”.

2013 yil bosh murabbiyni almashtirgan to'rtta klub:
“Qizilqum” – Ravshan Haydarov 1 aprelga qadar. Rustam Zabirov 2 apreldan boshlab 25 iyulgacha. Yuriy Lukin 26 iyuldan mavsum oxirigacha.
 “Dinamo” – Kamo Gazarov 9 mayga qadar. Ravshan Haydarov 10 maydan boshlab mavsum oxirigacha.
“SHo'rtan” – Edgar Gess 14 mayga qadar. Zoir To'raqulov 15 maydan – 18 oktyabrgacha. Erkin Mirzaev 19 oktyabrdan boshlab mavsum oxirigacha.
 “Neftchi” – Yuriy Sarkisyan 16 mayga qadar. Evgeniy SHoxin 17 maydan 1 iyunga qadar. Amet Memet 2 iyundan mavsum oxirigacha.  

Ushbu mavsum 27 yildan buyon “Neftchi”ga ustozlik qilib kelgan Yuriy Sarkisyan o'z vazifasidan ozod qilingani bilan yodda qoldi. Farg'ona klubi rahbariyati may oyida tajribali murabbiyni ishdan bo'shatishga qaror qildi. Undan so'ng jamoani malum muddat Evgeniy SHoxin, ikkinchi davradan boshlab esa ukrainalik mutaxassis Amet Memet boshqardi.

G'uzorning “SHo'rtan” klubida ham shu yilning o'zida uch bor murabbiy almashdi. Mavsumni Edgar Gess bilan boshlandi, uni o'rnida Zoir To'raqulov ishladi, mavsum so'nggida esa Erkin Mirzaev vaqtincha bosh murabbiy vazifasini bajaruvchi etib tayinlandi. Bu holat “Qizilqum”da ham kuzatilgani diqqatga sazovor. Ravshan Haydarovni aprel oyi boshida istefoga chiqargan “Qizilqum” rahbarlari uni o'rniga kelgan Rustam Zabirovga iyul oyi oxirida javob berishdi. Ikkinchi davrada jamoani boshqargan Yuriy Lukin “Qizilqum”ni oliy ligada olib qolishga erishdi.

Samarqandning “Dinamo” klubini mavsumga Kamo Gazarov tayyorlagandi. Dastlabki 7ta turdagi qoniqarsiz natijalar tufayli rahbariyat uni o'rniga “Qizilqum”dan ketgan Ravshan Haydarovni olib keldi va aynan shu murabbiy klub bosh murabbiyi sifatida mavsumni yakunladi. Haydarov bu yil oliy liganing ikkita klubida ishlagan yagona murabbiy bo'ldi.

Murabbiylar orasida eng ko'p g'alabaga Mirjalol Qosimov va Hakim Fuzaylov erishishdi. “Bunyodkor” va “Lokomotiv” 26 ta o'yindan 19 tasida uch ochkoga ega chiqdi. Kamo Gazarov (7ta o'yin), Erkin Mirzaev (4ta o'yin) va Evgeniy SHoxin (2ta o'yin) bu yil umuman g'alabaga erisha olishmadi. Igor SHkvirin  boshchiligida “Olmaliq” klubi eng ko'p 7 marta durang o'ynadi. Ikki murabbiy qo'l ostida Yuriy Lukin (“Qizilqum” ) va Evgeniy SHoxin (“Neftchi”) jamoalar bu yil durang qayd etishmadi. Eng kam mag'lubiyatga uchragan murabbiy “Neftchi”ni ikki bor maydonga boshlab tushib ikki marta mag'lub bo'lgan Evgeniy SHoxin bo'ldi. Agarda o'yinlarga nisbatan olsak Qosimov jamoasi 26ta o'yinda atiga 3 bor raqibga imkoniyatni boy berib qo'ydi. “Guliston” esa Baxtiyor Ashurmatov qo'l ostida 18 marta yutqazdi. Aynan Ashurmatov bu yil mag'lubiyat alamini eng ko'p bor totib ko'rgan murabbiy bo'ldi.

Mirjalol Qosimov boshchiligida “Bunyodkor” 26 ta o'yinda 61 ochko to'pladi. Bu eng yuqori ko'rsatkich bo'ldi. Eng kam ochkoni esa ikki murabbiy yig'di. Yuqorida yozilganidek “Neftchi” bilan ikki o'yinda ikki bor taslim bo'lgan Evgeniy SHoxin umuman ochko ololmagan yagona murabbiy bo'ldi.

Ochkolarni foiz hisobida hisoblab chiqsak “Bunyodkor” murabbiyi Mirjalol Qosimov eng yuqori natijaga erishdi. “Qaldirg'ochlar”ni chempion qilgan Qosimov yig'ish mumkin bo'lgan ochkolarning 78,21 foizini qo'lga kiritdi. Bu borada keyingi o'rinlar xuddi oliy liga jadvali kabi ko'rinish olgan Hakim Fuzaylov – 76,92 foiz, Ro'ziqul Berdiev – 74,36 foiz. Bu borada eng past ko'rsatkichga Evgeniy SHoxin “erishdi” – 0 foiz. Erkin Mirzaev esa 4ta tur davomida “SHo'rtan” bilan 1 ochko yig'di. Bu esa yig'ish mumkin bo'lgan ochkolarning 8,33 foizini tashkil qiladi.

Ko'pgina murabbiylar o'yin vaqtida topqirlik bilan o'yinchi almashtirishga intilishadi. Agar zaxiradan maydonga tushirgan futbolchisi gol ursa buni “samarali o'zgartirish” deb atasak bo'ladi. Oliy liga-2012 da 51 ta futbolchi aynan zaxiradan maydonga tushib gol urgandi. Bu yil esa bunday holat 60 marta kuzatildi. 2013 yilgi mavsumda jami 544ta gol urilganini eslatib o'tmoqchimiz.  

“Lokomotiv” ustozi Hakim Fuzaylov 2013 yilda 9 marta samarali o'zgartirishni amalga oshirib bu borada eng topqir murabbiy nomiga erishdi. Keyingi o'rinlarda Mirjalol Qosimov (8ta) va Igor SHkvirin (7ta) kabi murabbiylar qayd etilishdi. Yuriy Sarkisyan, Edgar Gess, Kamo Gazarov, Ravshan Haydarov, Erkin Mirzaev va Evgeniy SHoxin bu mavsumda bironta ham samarali o'zgartirishni amalga oshira olishmadi. 

Murabbiy	Klub	1	2	3	4	5	6	7	8
Agamurodov Tachmurod	Buxoro	26	10	3	13	33-44	33	42.31	1
Ashurmatov Baxtiyor	Guliston	26	6	2	18	28-62	20	25.64	2
Bayramov Mustafo	Navbahor	26	7	6	13	30-48	27	34.62	3
Berdiev Ro'ziqul	Nasaf	26	18	4	4	64-27	58	74.36	6
Ismoilov Murodjon	Paxtakor	26	17	3	6	45-25	54	69.23	5
Qosimov Mirjalol	Bunyodkor	26	19	4	3	59-13	61	78.21	8
Mirsodqov Rustam	Metallurg	26	10	3	13	36-45	33	42.31	5
Hakim Fuzaylov	Lokomotiv	26	19	3	4	63-21	60	76.92	9
Fayziev Davron	So'g'diyona	26	8	4	14	34-54	28	35.9	5
SHkvirin Igor	Olmaliq	26	11	7	8	46-43	40	51.28	7
Haydarov Ravshan	Qizilqum / Dinamo	23	8	5	10	31-36	29	42.03	0
Memet Amet	Neftchi	16	7	2	7	18-15	23	47.92	3
To'raqulov Zoir	SHo'rtan	15	2	3	10	12-23	9	20	2
Lukin Yuriy	Qizilqum	13	6	0	7	14-17	18	46.15	3
Zabirov Rustam	Qizilqum	9	2	1	6	10-20	7	25.93	1
Sarkisyan Yuriy	Neftchi	8	2	1	5	9-12	7	29.17	0
Gazarov Kamo	Dinamo	7	0	3	4	1-11	3	14.29	0
Gess Edgar	SHo'rtan	7	2	1	4	5-10	7	33.33	0
Mirzaev Erkin	SHo'rtan	4	0	1	3	5-14	1	8.33	0
SHoxin Evgeniy	Neftchi	2	0	0	2	1-4	0	0	0

Izoh: 1-o'yin, 2-yutuq, 3-durang, 4-mag'lubiyat, 5-urilgan va o'tkazib yuborilgan gollar soni, 6-jamg'arilgan ochkolar, 7-ochkolar foiz hisobida, 8-samarali o'zgartirishlar.   


Narzulla Saydullaev tayyorladi