Oliy liga-2013 yakunlari. Kamaygan sariq va qizil kartochkalar haqida

Bu yilgi oliy ligamizda bo'lib o'tgan 182 ta o'yin davomida hakamlar 29 marta futbolchilarni maydondan chetlatishgan. Har bir o'yinga o'rtacha 0,16 tadan qizil kartochka to'g'ri kelmoqda. Yani har oltinchi o'yinda bitta qizil kartochka ko'rsatilgan deganidir.

Oliy ligamizda jamoalar soni o'zgarib borgani va shu baroborida o'yinlar soni turlicha bo'lgani tufayli chetlatishlarning o'rtacha ko'rsatkichiga qarab baho berish to'g'ri deb o'ylaymiz. So'nggi 10 yillikni oladigan bo'lsak oliy ligamizda har bir o'yinga o'rtacha 0,2 tadan qizil kartochka to'g'ri keladi. Eng yuqori ko'rsatkichlar 2006 va 2010 yillarga to'g'ri keladi. SHu yillarda har bir o'yinga o'rtacha 0,24 tadan chetlatish to'g'ri kelgan. Ancha “sokin” o'tgan 2011 yilda esa eng kam qizil kartochka ko'rsatilgan, har bir o'yinga o'rtacha 0,14 tadan. Bu yilgi mavsumda ham chetlatishlar soni keskin kamaydi.

Ogohlantirishlar ham o'tgan yilga nisbatan kamaydi – 629ta (o'rtacha 3,46tadan sariq). So'nggi 10 yillikda o'rtacha eng kam sariq kartochka aynan shu yil ko'rsatildi. 2010 yilda eng ko'p sariq kartochka ko'rsatilgan – har bir o'yinga o'rtacha 4,24 tadan.

So'nggi 10 mavsum davomidagi qizil va sariq kartochkalar
 

1	2	3	4	5	6
2004	182	40	0,22	654	3,59
2005	182	38	0,21	680	3,74
2006	240	58	0,24	894	3,72
2007	240	39	0,16	861	3,59
2008	240	43	0,18	852	3,55
2009	240	54	0,22	908	3,78
2010	182	43	0,24	772	4,24
2011	182	26	0,14	642	3,53
2012	182	42	0,23	693	3,81
2013	182	29	0,16	629	3,46

Izoh: 1 – yil, 2 – jami o'yinlar soni, 3 – qizil kartochkalar, 4 – o'rtacha qizil kartochkalar soni, 5 – sariq kartochkalar, 6 – o'rtacha sariq kartochkalar soni.

SHu yilning o'ziga to'xtaladigan bo'lsak 2 nafar futbolchi ikki martadan qizil kartochka olganini ko'rishimiz mumkin bo'ladi. “Dinamo” klubining yosh vakili Komil SHarofetdinov oliy ligadagi o'zining dastlabki mavsumidayoq 2ta qizil va 4ta sariq kartochka “ishlab oldi”. Yarim himoyachi dastlabki qizil kartochkasini “Buxoro”ga qarshi kechgan 8-tur o'yinida ishlab olgandi. O'shanda u hakam tomonidan ikkita marta sariq kartochka bilan jazolanib maydonni tark etishga majbur bo'lgandi. 13-turda “Qizilqum”ga qarshi o'yinda Dilshod SHarofetdinovning ukasi to'g'ridan-to'g'ri qizil kartochka olgandi. Etiborlisi, ikkala o'yinda ham Komil o'yinga hakam tomonidan qo'shib berilgan daqiqalarda chetlatilgan. 

Ikki marta qizil kartochka olgan yana bir futbolchi Jalil Kimsanov bo'ldi. Mavsumni “So'g'diyona”da boshlab “Qizilqum”da tugatga himoyachi bu yilgi mavsumda qizil kartochka olgan dastlabki futbolchiga aylangandi. Dastlabki turda “Bunyodkor”ga qarshi o'yinning 12-daqiqada Kimsanov darvozaga kirib ketayotgan to'pni qo'li bilan qaytargani uchun chetlatilgan. Davralar oralig'ida “Qizilqum”ga o'tgan futbolchi 15-turda “Nasaf”ga qarshi bahsning 84-daqiqasida ikkinchi sariq kartochkani olib maydonni tark etgandi. Qizig'i aynan o'sha o'yindan so'ng Jalil Kimsanov umuman maydonga tushgani yo'q.

2013 yilda “Paxtakor” yarim himoyachisi Oybek Qilichev oliy ligada eng ko'p sariq kartochka olgan futbolchiga aylandi. U bu yil hakamlar tomonidan 10 marta ogohlantirildi. 8 martadan sariq kartochka olgan Robbim Hasanov (“Guliston”) bu borada ikkinchi bo'ldi.

Jamoalarni oladigan bo'lsak “Lokomotiv” klubidan hech bir futbolchi mavsum davomida qizil kartochka olmadi. “Temiryo'lchilar” bu borada boshqalarga o'rnak bo'lishdi. “Olmaliq” va “Buxoro” futbolchilari esa 4 martadan chetlatish ishlab olishgan.

Sariq kartochkalar borasida “Metallurg” eng yaxshi ko'rsatkichga ega (28ta), “Neftchi” esa aksincha (62ta).

2013 yilda jamoalar olgan qizil va sariq kartochkalar soni

QK	SK	Jamoa
0	45	Lokomotiv
1	47	Bunyodkor
1	50	Qizilqum
1	62	Neftchi
2	28	Metallurg
2	41	Paxtakor
2	42	Guliston
2	48	Navbahor
2	53	Dinamo
2	60	SHo'rtan
3	32	So'g'diyona
3	33	Nasaf
4	40	Olmaliq
4	48	Buxoro

Narzulla Saydullaev tayyorladi.