Oliy liga. 1-tur ramziy terma jamoasi

Xususan, "Mashal"ning safarda "Navbahor"ni, yana oliy ligaga qaytgan "Qo'qon-1912"ning esa "Dinamo"ni mag'lub etishi kutilmagan voqea bo'ldi. Bundan tashqari, amaldagi chempion "Paxtakor" o'z maydonida "Olmaliq" bilan durang o'ynadi. "Lokomotiv" esa Bekobodda "Metallurg" qarshiligini enga olmadi.



Biz saytimiz odatiga muvofiq 1-tur ramziy terma jamoasini tuzib chiqdik. Ramziy termadan "Metallurg", "Olmaliq", "Mashal", "SHo'rtan", "Nasaf", "Bunyodkor", "Qo'qon-1912", "Neftchi" va "Qizilqum" futbolchilari joy olishdi. Ayrim sabablarga ko'ra, "Buxoro", "Paxtakor", "So'g'diyona", "Dinamo", "Navbahor", "Lokomotiv" va "Andijon" klublaridan 1-tur ramziy termasiga hech kim kiritilmadi.

DARVOZABON
Suhrob Sultonov ("Metallurg")

HIMOYACHILAR
Mirg'iyos Sulaymonov ("Metallurg")  
Adrian Kashkaval ("Olmaliq")
Darko Stanoevich ("SHo'rtan")
Jahongir Jiyamurodov ("Mashal")



YARIM HIMOYACHILAR
Artur Gevorkyan ("Nasaf")
SHaker Zuagi ("Bunyodkor")
Jamshid Hasanov ("Mashal")
Orif Mamajonov ("Qo'qon-1912")
Akmal Xolmatov ("Neftchi")

HUJUMCHI
Bahriddin Vahobov ("Qizilqum")

Bosh murabbiy: Igor SHkvirin ("Olmaliq")



Oliy liganing ilk turini o'z maydonida o'tkazgan "Metallurg" chempionlikka davogar "Lokomotiv"ni qabul qilib, durangga erishdi. Bu o'yinda mezbonlar safida darvozabon Suhrob Sultonov yaxshi harakat qildi. SHuningdek, Mirg'iyos Sulaymonov ham ijobiy taassurot qoldirdi.

"Olmaliq"ning "Paxtakor"ga qarshi kechgan bahsida esa markaziy himoyachi Adrian Kashkaval ajralib turdi. U ko'plab vaziyatlarda raqib hujumini bartaraf etdi. "SHo'rtan" tarkibiga bu yil qo'shilgan serbiyalik Darko Stanoevich "Neftchi" darvozasiga to'p kiritgan bo'lsa, bir necha yillik tanaffusdan so'ng yana "Mashal"ga qaytgan Jahongir Jiyamurodov birinchi uchrashuvdayoq jamoaga kirishib keta oldi.

"Nasaf" etakchisi Artur Gevorkyan yana o'z mahoratini ko'rsatishni boshladi. Turkmanistonlik futbolchi "Andijon" darvozasiga ikkita to'p kiritishdan tashqari, uchinchi golda jamoadoshiga to'pni aniq etkazib berdi. Tunislik SHaker Zuagi "Buxoro" bilan kechgan bellashuvda o'zini ko'rsatdi. "Mashal"ning tezkor futbolchsi Jamshid Hasanov esa muborakliklarning safarda g'alaba qozonishiga munosib hissa qo'shdi.



Bir necha yillik tanaffusdan so'ng yana oliy ligaga qaytgan "Qo'qon-1912" safarda "Dinamo"ni kichik hisobda mag'lub etdi. Bu o'yinda Orif Mamajonov o'zini ko'rsata oldi. "Neftchi" tarkibida esa Akmal Xolmatov yaxshi harakat qildi. 1-turda "So'g'diyona" bilan bahs olib borgan "Qizilqum" yirik 4:1 hisobida zafar quchdi. Bu o'yinda Bahriddin Vahobov uchta gol urishning uddasidan chiqdi va bu yilgi chempionatning ilk xet-trik muallifi bo'ldi.

Tur ramziy terma jamoasiga bosh murabbiy sifatida "Olmaliq" ustozi Igor SHkvirinni tanladik. Negaki "Olmaliq" amaldagi chempion uyidan durang bilan qaytdi. Qolaversa, shu kuni "Olmaliq" o'yinni asosiy tarkibda sakkiz nafar yangi futbolchi bilan boshlagan bo'lishiga qaramay, yigitlar o'zlarini yo'qotib qo'yishmadi. Igor SHkvirin esa joriy mavsum kuchli jamoani yuzaga keltirsa ajab emas.