OCHL-2015. Berdievda uchinchi, qolganlar uchun birinchi imkoniyat

SHunday qilib kelasi yil bizdan uchta jamoa (“Paxtakor”, “Lokomotiv”, “Nasaf”) OCHLni to'g'ridan to'g'ri guruh bosqichida boshlaydi. “Bunyodkor” esa pley-offdan boshlaydi. Etibor berib qarasak, birgina Ro'ziqul Berdievni hisobga olmaganda, qolgan klublar bosh murabbiylari uchun kelasi yilgi chempionlar ligasi debyut musobaqa bo'lar ekan.

Xususan chempionlikni qo'lga kiritgan “Paxtakor” bosh menejeri Samvel Babayan bungacha bosh murabbiyi sifatida ro'yxatdan o'tmagandi. Endi bo'lsa ham murabbiy, ham menejer sifatida “zayavka” qilinadi. Yani, uning murabbiy ekanligini ham inobatga olsak, Osiyo chempionlar ligasi Babayan uchun debyut musobaqa hisoblanadi.

“Lokomotiv” ustozi Vadim Abramov ham hozircha chempionlar ligasida qatnashmagan. Bu gap shuningdek “Bunyodkor” bosh murabbiyi Sergey Lushanga ham tegishli. Demak, bu ikki murabbiy ham klublar o'rtasidagi nufuzli musobaqada kelasi yil o'z debyutlarini o'tkazishadi.

“Nasaf”ni boshqarayotgan Ro'ziqul Berdiev uchun esa OCHL ilk musobaqa emas. CHunki murabbiy bungacha ikki mavsum OCHLda “Nasaf”ni boshqargan. Xususan 2012 yil o'z tarixida ilk bor ushbu turnirda qatnashgan “Nasaf” guruh o'yinlarida atigi bir ochko bilan oxirgi o'rinni band qilgandi. SHu yilning boshida o'tkazilgan pley-off bosqichida esa qarshiliklar Qatar klubidan yirik hisobda mag'lub bo'lishdi. Demak, bu safargi ishtirok Berdiev uchun uchinchisi bo'ladi.

SHunday ekan, kelasi yil OCHL bahslarini intizorlik bilan kutishimiz uchun asos bor. Agar “Bunyodkor” pley-offdan o'tib olsa, guruh bahslarida bizdan to'rtta klub bo'ladi. Bu esa OFK tomonidan berilgan yana bir imkoniyat deganidir. Umuman olganda, OFK bizga har doim imkoniyat berib kelgan. Faqat bundan foydalanish, OFKning bekorga 3+1 bermaganini isbotlash esa to'rtta klubning zimmasidagi ish hisoblanadi.