Nigeriyalik futbolchilar “Yashnobod” jamoasi mashg'ulotlarida qatnashmoqda

Hozirda yashnobodliklar futbol bo'yicha Toshkent shahar chempionati ikkinchi ligasi bahslarida peshqadamlar safida borishmoqda. Jamoa musobaqaning hal qiluvchi bosqichida o'nta jamoa o'rtasida bugungacha o'tgan 15 uchrashuvdan so'ng, 29 ochko jamg'argan holda ikkinchi pog'onani egallab turibdi. “Yashnobod” futbolchilari oldiga yangi mavsumda O'zbekiston milliy chempionati PRO ligasida qatnashish vazifasi qo'yilgan.

Yashnobodliklar chempionat uy uchrashuvlarini “Obod” suniy qoplamali stadionida o'tkazayotgan bo'lsa, mashg'ulotlarni tumandagi 198-umumtalim maktabi o'yingohida olib boryapti. Kuni kecha jamoa mashg'ulotlariga “qora qita”ning Nigeriya mamlakatidan kelgan futbolchilar ham qo'shildilar.

— Debyut mavsumini jamoamiz yomon o'tkazmayapti, — “Yashnobod” professional futbol klubi bosh murabbiyi Aziz Fayziev. — Jamoamiz tarkibini asosan 19-20 yoshli o'yinchilar tashkil etadi. Tuman hokimligi jamoamizning kelgusida kuchlilar safida to'p tepishi uchun barcha shart-sharoitlarni yaratib berishga harakat qilyapti. Klubimiz bosh xomiy — ARTEL brendi ostida maydonga tushyapti. Hozirda jamoamiz azolarining mashg'ulotlar va chempionat uchrashuvlarini o'tkazishlari uchun besh ming tomoshabinga mo'ljallangan zamonaviy stadion loyihasi tayyorlanyapti. Ikkinchi liga o'yinlari tugashiga 3 tur qoldi. Kuni kecha mashg'ulotlarimizga shu kunlarda yurtimizda bo'lib turgan nigeriyalik futbolchilar ham qo'shilishdi. O'z o'yinchilarimiz qatorida ularning xatti-harakatlarini ham kuzatyapmiz. Nigeriyaning DOSAD Football Academysining menejeri Robert Nvokike etti shogirdi bilan mashg'ulotlarda ishtirok etyapti. Asosan 19-20 yoshli nigeriyalik futbolchilar orasida iqtidorlilari ham ajralib turibdi. Ularning kelgusida “Yashnobod” jamoasida qolish-qolmasligini vaqt ko'rsatadi, albatta. Hozir esa bor diqqat-etiborimizni chempionat uchrashuvlarini muvaffaqiyatli yakunlashga qaratganmiz.