Nematulla Quttiboev: "Hali hech kim hech narsa yo'qotmadi. Kurash so'nggi turgacha davom etadi"

- "Lokomotiv"ni g'alaba bilan tabriklayman. Bugun qiziq o'yin bo'ldi. Ikkinchi bo'limda raqiblar gol urib ketdi. Bizda esa futbolchilarimiz uch marta birga-bir chiqib gol ura olmadi. Bizda g'alaba qozonish uchun etarlicha vaziyatlar bo'ldi. Bugun jamoam yomon o'ynamadi, ayniqsa ikkinchi bo'lim oxirlarida yaxshi harakat qildik. Yana bir marta takrorlayman, bunday o'yinlarda yutish uchun gol urish kerak.

- Statistika shundayki, "Lokomotiv" o'z maydonida "Aral"ni mag'lub qiladi, "Aral" esa o'z maydonida "Lokomotiv"ni. Bu so'nggi turgacha davom etarmikin?

- Xudo xohlasa. Endi biz "Lokomotiv"ni o'z maydonimizda mag'lub etamiz.

- Superliga uchun kurash so'nggi turgacha davom etarmikin?

- Hozir Superliga uchun uchta jamoa kurash olib bormoqda. Hali hech kim hech narsa yo'qotmadi. Kurash so'nggi turgacha davom etadi deb o'ylayman.

- "Aral" jamoasiga mavsum boshida qanday vazifa qo'yilgandi va bu qanchalik amalga oshirilmoqda?

- Har o'yindan keyin shu savol beriladi. Vazifamiz - har o'yinda maydonga chiqib, g'alaba qozonish va muxlislarni xursand qilish. 

- Bugun birgina vaziyat o'yin taqdirini hal qildi. Ushbu vaziyat haqida fikringiz. O'sha paytda jamoa qanday xatoga yo'l qo'ydi?

- Himoyachilarimiz chuqur himoyalandi, uch markaziy himoyachi bir-biriga qarab qoldi. Yarimta vaziyat edi. Tayanch hududida esa futbolchilar etiborsizlikka yo'l qo'yishdi. Shu xatoning o'zi o'yin taqdirini hal qilib ketdi.

- Bugun 6 ochkolik o'yin bo'ldi deb hisoblaysizmi?

- Ha. Ayniqsa biz uchun.