Nemanya Yanichich: “Lokomotiv” “Qizilqum”ga qarshi boshqacha futbol namoyish etadi”

– Futbol o'ynamaganimga ham ancha bo'lgandi. Bahorda elkamdan jarohat olganim sabab, to'rt oy to'p tepa olmadim. Hozir esa o'zimni yaxshi his qilyapman va navbatdagi o'yinlarda jamoamizga yordam berishga tayyorman, – deydi serbiyalik himoyachi.

– Men uchun to'rt oy futbol o'ynamaslik juda og'ir bo'ldi, ammo oxirigacha sabr qilishimga to'g'ri keldi. Kubok o'yinida murabbiylar menga ham imkon berishdi va bundan juda xursandman. Afsuski, “Mashal” bilan kechgan javob uchrashuvida o'z maydonimizda yutqazib qo'ydik. Balki birinchi o'yinda 4:1 hisobida g'alaba qozonganimiz yigitlarga tasir qilgan bo'lishi mumkin, lekin muhimi yarim finalga chiqdik.

– Yaxshiyam bu mag'lubiyat Kubok bellashuvida yuz berdi va bu narsa bizni keyingi o'yinlarda yanada ehtiyotkor bo'lib harakat qilishga undaydi. Mana ko'rasiz, “Lokomotiv” “Qizilqum”ga qarshi umuman boshqacha futbol namoyish etadi. Maqsadimiz faqat g'alaba qozonib, uch ochkoni qo'lga kiritish.

Eslatib o'tamiz, Oliy liganing 13-tur qoldirilgan uchrashuvi bugun TTYMI stadionida bo'lib o'tadi. O'yin soat 20:00da boshlanadi.