"Navbahor": Mashg'ulotlar boshlandi

Kuniga bir mahaldan o'tkaziladigan mashg'ulotlarga bosh murabbiy Mustafo Bayramov boshchilik qilmoqda. Dastlabki yig'inda futbolchilarning jismoniy holatini tiklashga etibor qaratiladi. Umumiy hisobda dastlabki kungi mashg'ulotda 20 nafar futbolchi qatnashdi. 2013 yilgi chempionatda “Navbahor” sharafini himoya qilgan Ro'zim Ahmedov, Rustam Azamov va Pavel Leus kelgusi faoliyatlarini boshqa klublarda davom ettirishlari oydinlashdi. SHuningdek, mavsumning so'nggi qismini jarohati tufayli o'tkazib yuborgan Ilhom Boydedaev ham "Neftchi" safida shug'ullanmoqda. Qolgan futbolchilardan hali hech kim jamoadan ketishini bildirib rahbariyatga murojaat qilmadi. Yakuniga etgan chempionat so'nggida jamoada maslahatchi murabbiy sifatida ish boshlagan No'mon Hasanov yanvar oyida boshlanadigan yig'inda ishini davom ettiradi. Hasanov ikki kun oldin Namanganda bo'lib, klub rahbarlari bilan uchrashib, keyingi rejalar xususida kelishib olganligini ham etirof etish joiz.

Jamoaning tayyorgarlik rejasi xususida fikr yuritadigan bo'lsak, 2014 yilning 3 yanvaridan 19 yanvariga qadar o'tkaziladigan mashg'ulotlar Namangan shahrida tashkil etiladi. 22 yanvardan esa “Navbahor” tayyorgarlikni Toshkentda davom ettiradi. Fevral oyining dastlabki o'n kunligi oralig'ida Turkiyaga safar uyushtirish ham rejalashtirilmoqda. Agarda ushbu reja amalga oshadigan bo'lsa “Navbahor” Turkiyada ikki haftalik yig'in o'tkazish imkoniga ega bo'ladi.

Hozirda klub rahbariyati va murabbiylar shtabi tarkibni kuchaytirish maqsadida bir qator futbolchilar bilan muzokaralarga kirishishgan. Lekin, aynan kimlar bilan muzokaralar olib borilayotganligi sir tutilmoqda. SHu o'rinda, aytish joizki murabbiylar shtabi yangi mavsumda jamoa o'zagini yoshartirishga etibor qaratishlarini bildirishgan. SHu maqsadda tarkibga mahalliy bo'lgan iqtidorli yoshlarni jalb etish ko'zda tutilmoqda. Ular tajribali o'yinchilar bilan to'p surish orqali mahoratlarini oshirib borishadi.