“Nasaf” akademiyasi tarbiyalanuvchilari Qatardagi musobaqada ishtirok etishadi. Barcha xarajatlar Qatar hisobidan

Qatarda bo'lib o'tgan uchrashuv chog'ida tomonlar O'zbekiston va Qatar futbolini yanada rivojlantirish uchun hamkorlik aloqalarini kuchaytirish yo'lida memorandum imzolagandilar. SHuningdek, Umid Ahmadjonov Qatardagi dunyoga mashhur “Aspire” akademiyasiga tashrif buyurib, u erdagi sharoitlar bilan tanishgan holda, O'zbekistonda ham ana shu tajribani yo'lga qo'yish borasidagi hamkorlik masalasida kelishuvga erishgandi.

Qatarning dunyoga mashhur “Aspire” jamoasi Osiyoning eng yaxshi akademiyalari tarbiyalanuvchilari ishtirokida tashkil etayotgan musobaqaga, ikki mamlakat futbol associaciyalari o'rtasidagi memorandumga asosan O'zbekistondan ham futbolchilarni taklif etdi.

Mazkur musobaqada 2000, 2001 va 2003 yilda tavallud topgan yosh futbolchilar ishtirok etishadi. O'zbekistondan mazkur musobaqada Qarshining “Nasaf” klubi akademiyasi vakillari ishtirok etishadi. Xabaringiz bor, “Nasaf” akademiyasi 2017 yil yakuniga ko'ra O'zbekistonning eng yaxshi akademiyasi sifatida etirof etilgandi. Musobaqa joriy yilning 1-5 aprel kunlari o'tkaziladi.

Har bir yosh toifasida 16 nafardan futbolchini musobaqaga olib borish mumkin. Akademiya tarbiyalanuvchilarining Qatardagi musobaqaga borish-kelish xarajatlarining barchasi Qatar futbol Associaciyasi tomonidan qoplanadi.