Muslimbek Saidboev: "Menga natija umuman muhim emas"

- Bugun ajoyib o'yin o'tkazdik. Chunki tarkibimiz 17-18-19 yoshli yigitlardan iborat hisoblanadi. Asosiy maqsadimiz natija emas: O'zbekiston terma jamoalari va viloyatimiz bosh jamoasiga futbolchilar etkazib berish. Shu maqsad bo'yicha biz natijaga qaramasdan ishlashda davom etyapmiz.

- "Lokomotiv" fonida jamoangiz qanday ko'rindi?

- "Lokomotiv" azaldan O'zbekistonning brend jamoalaridan biri hisoblanadi. Klub asta-sekinlik bilan yana shunday bo'lishga harakat qilmoqda. Jamoam yomon ko'rinmadi.

- Guruhdagi "Bunyodkor" va "Buxoro" haqida fikrlaringiz qanday?

- Ular Superliga jamoalari hisoblanadi. Bizni xursand qiladigani shundaki, guruhdagi barcha raqiblarimiz juda yaxshi jamoalar. Shunday futbolchilarga qarshi o'ynash yosh futbolchilar uchun orzu. Keyinchalik o'z kumirlariga qarshi o'ynashadi. Ushbu futbolchilardan o'rnak olib, zinama-zina ko'tarilib borishadi. Bunday o'yinlar biz uchun juda katta tajriba sifatida xizmat qiladi. Menga natija umuman muhim emas, maqsadim futbolchilar etishtirib chiqarish.

- Birinchi ligadagi maqsad qanday?

- O'tgan yili Birinchi ligada 7-o'rinni qo'lga kiritdik. Bu yil esa natijani yaxshilashni niyat qilganmiz. Tarkibda o'tgan mavsumdagi o'zakni saqlab qolganmiz. Tarkib yuz foiz akademiyamiz tarbiyalanuvchilari hisoblanadi. O'tgan yildan yuqoriroq bo'lishga harakat qilamiz.

- "Lokomotiv" bugun qanday tarkibda o'ynashini kutgandingiz: tajribali futbolchilardan iborat jamoanimi yoki yosh futbolchilar aralashtirilgan asosiy tarkibnimi?

- Bugungidek asosiy tarkibni. Sababi o'zim shogirdlarimning shunday futbolchilarga qarshi o'ynashini havas qilaman. Chunki ular ushbu futbolchilarga qarab nimalardir oladi, intiladi va motivaciya oladi. Tajribasidan kelib chiqib, ularga o'xshashga harakat qiladi. Yoshlar tarkibi tushganida biz kutgandek tajriba bo'lmasdi.