Murod Ismoilov: “Bizga yaxshi markaziy himoyachi kerak”

Yangi mavsumga hozirlikni poytaxtda davom ettirayotgan “Neftchi” o'zining dastlabki o'rtoqlik uchrashuvini “Metallurg”ga qarshi o'tkazib, 3:4 hisobida imkoniyatni boy berdi. Bahs yakuniga etgach, bosh murabbiy Murod Ismoilovdan intervyu oldik.  

- 12 yanvardan mavsumga tayyorgarlikni Toshkentda olib boryapmiz, - deya so'z boshladi Murod Muzaffarovich. - Mana bugun rejamizdan o'rin olgan birinchi o'rtoqlik uchrashuvini “Metallurg”ga qarshi o'tkazdik. Aslida bekobodliklar bilan ikkita o'yin o'tkazishimiz lozim edi, biroq bir nechta futbolchimiz betob bo'lib qolgani bois bitta o'yinda maydonga tushdik. Birinchi taymdagi o'yinimiz yoqdi, yigitlarning harakatidan qoniqdim. Lekin ikkinchi bo'limda asosan yoshlar to'p surgani uchun o'yin unchalik qovushmadi. Nazorat bellashuvlaridan ko'zlangan maqsad – yoshlarni va tarkibga endi kelib qo'shilganlarni ko'zdan kechirib olish. SHunday ekan, natija u qadar katta ahamiyat kasb etmaydi.

- “Neftchi”ning keyingi rejalari qanday?
- 21 yanvar kuni “Olmaliq”, 24 yanvarda “So'g'diyona” va 28 yanvarda “Mashal” bilan kuch sinashamiz. Bu uchrashuvlarda ham tarkibni shakllantirish ustida ishlaymiz. Undan keyin Farg'onaga qaytib, viloyat hokimi Kubogida ishtirok etamiz va fevralning o'rtalarida yig'inni davom ettirish uchun Turkiyaga yo'l olamiz.
 
- Malumki, yig'iining birinchi qismida asosan mahalliy yigitlarni ko'zdan kechirdingiz. Bu qanchalik foyda berdi?  
- Farg'onada ko'proq asosiy tarkibga yaqinroq futbolchilarni sinovdan o'tkazdik va ularni ham poytaxtga olib keldik. 1995-96-97 yillarda tug'ilgan futbolchilar bilan Sergey Kovshov u yoqda qolib birga ishlayapti. O'zingizga malum, mavsum yakuniga etganidan so'ng bir nechta futbolchi safimizni tark etdi va hozir ketganlar o'rnini to'ldirish ustida ishlayapmiz.

- Farg'onadan har doim yosh iqtidorlar etishib chiqqanini yaxshi bilamiz. “Neftchi” mahalliy yoshlarni o'zida saqlab qolishi uchun farm-klub tashkil qilib, birinchi ligada o'ynatgani maqulmi?
- Bu yil ikkinchi liga bahslarida “Neftchi”dan ikkita jamoa ishtirok etadi. SHuningdek, Marg'ilonda ham birinchi liga jamoasi bo'lishi haqida gap-so'zlar yuribdi. “Neftchi”ni tark etgan futbolchilarni ortga qaytarish oson bo'lmaydi, shunday ekan, biz uchun muhimi hozirgi tarkibni saqlab qolishdir. Agar rahbariyat tashabbus ko'rsatib, birinchi ligada farm-klubni tashkil qilsa yaxshi bo'lardi. Ayni paytda Farg'onada yangi qurilayotgan futbol akademiyasini foydalanishga topshirish borasida keng ko'lamdagi ishlar olib borilmoqda.
 
- Jamoada legionerlar masalasi qanday hal etiladi?
- Safimizga yaqinda kelib qo'shilgan Aleksandr Onika o'zidan yomon taassurot qoldirmadi. Devid Oniyaning biz bilan shartnoma tuzganidan xabaringiz bor. Bundan tashqari, yana ikki nafar legionerning kelishi kutilyapti. Bizga Oniya bilan tandem bo'la oladigan yaxshi bir markaziy himoyachi kerak.

Xayrulla Xoliqov suhbatlashdi