Mirjalol Qosimov: "Saudiya Arabistoniga qarshi o'yinda faqat g'alaba uchun tushamiz"

Mag'lubiyatdan so'ng tabiiyki Qosimovning kayfiyati yo'q edi. OFK vakili dastlab murabbiyga toza o'yin vaqti 60 daqiqadan oshgani uchun maxsus sovrin taqdim etdi.

"Bugun g'alaba qozonmoqchi edik. Yutuq bizni keyingi bosqichga olib chiqardi. Xitoyni g'alaba bilan tabriklamoqchiman. Xitoy jamoasi yaxshi o'ynadi va bizga ikkita gol urdi. Gol o'tkazilgan vaziyatda oddiy xatoga yo'l qo'ydik. Keyingi bahsga tayyorgarlik ko'ramiz. Saudiya Arabistoni bilan bahsda g'alaba qozonib o'z oldimizga qo'yilgan vazifani bajarishga umid qilamiz", - deydi Qosimov.

- Bugungi issiq havo va namlik futbolchilarga tasir qildimi?
- Albatta, bizga ham xitoyliklarga ham bu holat tasir qilgani tabiiy.

- Xitoyni mensimaslik holati bo'ldimi. Balki shu tufayli mag'lub bo'lgandirsizlar?
- Yo'q. Bunday holat yuzaga kelmadi. Xitoy kuchli raqib ushbu jamoani hurmat qilamiz.

- Bugungi mag'lubiyat Saudiya Arabistoniga qarshi bahsda sizlarni ancha qiyin holatga tushirdi.
- To'g'ri so'nggi turga qadar barchasini hal qilishimiz kerak edi. Lekin 3-turda biz faqat g'alaba uchun maydonga tushamiz.

- O'zbekiston chempionatida mavsumni yaxshi o'tkazgan Suyunov, Muhammadiev, Iskanderov va Rashidov kabi futbolchilar asosiy tarkibda o'ynay olishadimi?
- Albatta hozir tarkibimizda bor bo'lgan barcha o'yinchilar asosiy tarkibga tortadi. Lekin KXDR bilan bahsda g'alaba qozonganimiz uchun g'olib tarkibni almashtirmaslikka qaror qildim. Sanab o'tilgan futbolchilar albatta bizning kelajagimiz.

- Jeparovning erta almashtirilishiga sabab nima bo'ldi?
- Sababi Server qanotda harakat qildi. Qanot o'yinchilar ancha ko'p harakat qilishadi, shu bois charchab qolgan Jeparovni almashtirdim.

- Birinchi o'tkazilgan vaziyat haqida nima deya olasiz?
- To'g'risi himoyachilarimiz yo'q joydan raqibga gol sovg'a qilishdi. Doim oxirigacha kurashish lozim. Ayniqsa Osiyo Kubogidek musobaqada. 

Narzulla Saydullaev
Brisben shahridan