Mirabror Usmonov: "Kelishilgan o'yinlarning borligi haqida matbuot bekorga bong urmayapti"

Bu haqda O'FF rasmiy tvitteri xabar berdi.

O'FF Ijroiya Qo'mitasi majlisida kun tartibiga qo'yilgan masalalar orasida kelishilgan o'yinlarga qarshi kurashishga alohida urg'u berildi. Unga ko'ra, Ijroiya qo'mitasi kelishilgan o'yinlarga qarshi ayovsiz kurashish orqali futbolda tozalash ishlari olib borilishi haqida Qaror qabul qildi. Qarorga ko'ra, kelishilgan o'yinlarda ishtirok etganlarni monitoring qilish bo'yicha O'zbekiston Professional Futbol Ligasida ishchi guruhi tuziladi.

Ijroiya Qo'mitasi majlisida kun tartibiga qo'yilgan masalalar haqida O'FF prezidenti Mirabror Usmonov quyidagilarni aytdi.

Biz qandaydir yutuqlarni qo'lga kirityapmizu, o'z qozonimizda qaynayotgan ayrim muammolarni esa, ko'rmayapmiz. Bugungi kunda kelishilgan o'yinlarning borligi haqida matbuot bekorga bong urmayapti. Buni o'ylashimiz kerak. OAVdagi chiqishlar va matbuotdagi maqolalarni ko'rib, bu masala yuzasidan qatiy chora-tadbirlar belgilanishini tavsiya qilaman, - deydi Usmonov.

Ijroiya Qo'mita azolari ko'rib chiqqan yana bir muhim masala terma jamoalar faoliyatiga dahldor bo'lib keng muhokamaga sabab bo'ldi. Mahalliychilik, tanish-bilishchilik va urug'-aymoqchilik holatlariga yo'l qo'yilmaslik masalasiga ham Mirabror Usmonov alohida to'xtaldi.

M. Usmonov: Futbolchilar ro'yxatini murabbiy tuzadi, tuzaversin, marhamat. Murabbiyning ishiga aralashmaymiz. Haqqimiz yo'q. Lekin, mana shu erda tanish-bilishchilik, mahalliychilik va urug'-aymoqchilik bo'lsa, biz bunga jim qarab turolmaymiz. Odillik bo'lsin. Hech kim kimningdir qarindoshi bo'lganligi sabab terma jamoaga kelishiga yo'l qo'ymaymiz.

O'zbekiston Futbol Federaciyasining Ijroqo'm azolari ushbu masalani ham bir ovozdan qo'llab-quvvatladi va Qaror qabul qildi.

Unga ko'ra, bu kabi illatlarni oldini olish va nazorat qilish uchun 1 fevralga qadar bir necha mutaxassislardan iborat guruh tuziladi.

SHuningdek, O'zbekiston milliy terma jamoalariga nomzod futbolchilarni jalb qilishning yangi tartibi ishlab chiqiladi. O'FF Ijroqo'mi yig'ilishida kun tartibidan o'ring olgan yana bir nechta masalalar yuzasidan Qarorlar qabul qilindi. Ular orasida FIFA va OFK reglamentiga to'la javob bera oladigan, zamonaviy va hashamatli futzal saroyini qurish bo'yicha ham qaror qabul qilindi.

SHuningdek, Bolalar-o'smirlar futbolini rivojlantirish maqsadida O'zbekiston Futbol Federaciyasida yangi boshqarma ham tashkil etiladi. Majlis yakunida, 1 fevralgacha bo'lgan muddat ichida yuqoridagi barcha strukturalar O'FF Kotibiyatiga ish rejalarini topshirishlari belgilab qo'yildi.

O'FF matbuot xizmati.