"Mashal-2" - "Andijon" uchrashuvidan keyingi fikrlar

Dilshod ANDAEV (“Mashal-2” jamoasi bosh murabbiyi):
- Bugun shogirdlarim ko'rsatgan o'yin yoqdi. Ammo yaratilgan vaziyatlardan foydalana olmadik. Albatta, oliy va birinchi liga jamoalari o'rtasida farq bor. Agar bugun g'alaba qozonganimizda futbolchilarda o'zlariga bo'lgan ishonch ortardi. Negadir so'nggi paytlarda imkoniyatlardan foydalana olmayapmiz. Bugun ham shu sababli mag'lubiyatga uchradik. Kamchiliklarimiz ustida ishlashda davom etadi. O'z navbatida “Andijon” jamoasini g'alaba bilan tabriklayman va keyingi bosqichda ham omad tilayman.
Garchi, raqibimiz oliy liga jamoasi bo'lishiga qaramay, maydonga g'alaba qozonish maqsadida tushgandik va shunga yarasha tayyorgarlik ko'rgandik. Yana bir bor aytaman, bolalar yomon o'ynashgani yo'q.

Oleg TYULKIN (“Andijon” jamoasi katta murabbiyi):
- O'yin jamoamiz ustunligi ostida o'tdi va yakunda g'alabani qo'lga kiritdik. Bugun yirik hisobda yutishimiz ham mumkin edi, ammo ko'plab vaziyatlardan foydalana olmadik. Raqib darvozasi oldida bir qator imkoniyatlar bo'ldi. Faqat bu vaziyatlarni golga aylantira olmadik. Garchi kichik hisobda bo'lsa-da, kerakli natijaga erisha oldik va g'alaba qozonganimizdan xursandmiz. Raqibdan kuchli edik va g'alabani qo'lga kiritib nimchorak finalga yo'l oldik. O'zbekiston Kubogining keyingi bosqichida ham muxlislarimizni xursand etishga harakat qilamiz.  
 “Mashal-2” yoshlardan iborat bo'lgan yaxshi jamoa ekanligini aytib o'tishim kerak. Tarkibida iqtidorli bolalar ko'p va ularni yorqin kelajak kutyapti deya olaman.