Marufjon Abdisolomov: “Ashurmatov o'z ishini davom ettiradi”

Bosh murabbiy Baxtiyor Ashurmatovning istefoga chiqishi va uning o'rniga qaysi murabbiyning taklif etilishi borasidagi xabarlar deyarli kun mavzusiga aylandi. SHu kabi jumboqlarga javob topish maqsadida “Andijon” klubi vice-prezidenti, bosh direktori Marufjon Abdisolomovga murojaat qildik.

- So'nggi paytlarda Baxtiyor Ashurmatovning jamoamizdan ketkani xususidagi xabarlarga qisqacha javobim  shuki, bosh murabbiy jamoada qolib o'z ishini davom ettirmoqda. To'g'ri, malum sabablarga ko'ra, Baxtiyor Azamovich jamoa bilan birga bo'la olmadi. Bu klubning ichki siri hisoblanadi. “Olmaliq”qa qarshi uchrashuvga jamoani Ashurmatovning o'zi maydonga olib tushadi. Murabbiylar shtabida ayrim o'zgarishlarga qo'l urdik. Bungacha bosh murabbiyga yaqindan yordam berib kelgan Zohid Nurmatov, SHuhrat Maqsudov va Kamol Jo'nashev o'z arizasiga binoan istefoga chiqdi. Ular endilikda faoliyatini boshqa jamoalarda davom ettiradigan bo'ldi. SHu bois kelgusida Ashurmatovga mahalliy murabbiylarimiz ko'maklashadigan bo'lmoqda. Bungacha yoshlar jamoamizga ustozlik qilib kelgan Vitaliy Legay endi asosiy jamoa murabbiylar shtabida ishlaydi. Qolaversa hozir bu borada yana boshqa nomzodlarni ko'rib chiqmoqdamiz. Bosh murabbiy bilan o'zaro maslahatlashgan xolda, andijonlik iqtidorli murabbiylar Baxtiyor Azamovichning yonida yurib, tajribasini oshirib boradi degan fikrga bordik.  

- Orif Mamatkazinning “Andijon”ga bosh murabbiy etib tayinlangani mish-mishdan boshqa narsa emas. Bilmadim, jurnalistlar bu malumotni qaerdan oldi ekan. Orif Ismoilovich katta tajribaga ega mutaxassis. Bugungi kunda u “Andijanka” ayollar jamoasini juda yaxshi boshqarib bormoqda va uning olib borayotgan faoliyatidan to'liq qoniqish xosil qilmoqdamiz.

- Oldimizda  birinchi davradan o'rin olgan juda muhim va shu bilan birga qiyin o'yinlar turibdi. Nasib qilsa ijobiy natijaga erishib, quyi pog'onalardan chiqib ketamiz – deya vaziyatga izoh berib o'tdi Marufjon Jamoldinovich.